– Sis-Finnmárkkus lea heahtedilli boazodoalus go lea heajos ealát. Jus dálki joatká nu movt lea leamaš, de sáhttá šaddat stuorámus roassun Norggas, oaivvilda orohaga 16 Kárášjoga oarjjabealde jođiheaddji John Anders Sara.
Orohaga 16 Kárášjoga oarjjabealde jođiheaddji John Anders Sara lohká heađi boazodoalus Sis-Finnmárkkus.
– Dán jagi lea heahti Sis-Finnmárkku boazodoalus. Mis leat siiddat mat leat jo johttán eret dálveorohagain, ja nu leat maid eará báikkiin dahkan. Dan jagáš dilli ii leat dábálaš, lea ekstrema dilli. Jus dálki joatká nu movt dassážii lea leamaš, de sahttá šaddat stuorámus roassun Norggas, dadjá Sara.
Dán dálvvi lea earenoamáš ollu muohta. Dat dagaha ahte guohtumat lea lohkkašuvvan ja bohccot eai ole bodnái guohtut.
– Gaskal juovllaid ja ođđajagi molsašuvai dálki. Dat lea borgan, bivaldan, buolaštan, ja de fas borgan. Bohccot šaddet vađđaeatnamiin guohtut, vuomis lea čeargan. Siiddat leat ferten álgit biebmat suinniiguin. Dal eai leat galle siidda šat mat eai leat álgán biebmat, ja mun rehkenasttán boahtte vahkkus leat buot siiddat biebmame, dadjá Sara.
Duođašta guohtunváttisvuođa
Romssa ja Finnmárkku fylkkamánni sekšuvdnajođiheaddji Nuorta-Finnmárkku boazodoalus, Ingolf Balto, duođašta Sis-Finnmárkkus lea guohtunváttisvuođat.
– Lea olu muohta oarjjábeale ja dat dagaha váttisvuođa guohtumis. Mii leat plánen fitnat geahččame muhtun siiddain vuoi oaidnit váttisvuođaid, dadjá Balto.
Ohcan doarjaga
Boazodoalu heahtegearggusvuođafoanddas sáhttet orohagat ohcat doarjaga jus lea heahtedilli ealáhiin. Boazodoallošiehtadusas 2019/2020 lea Stáhta ja Norgga Boazosápmelaččaid Riikkasearvi bidjan oktiibuot 2 miljovnna ruvnno fondii. Orohagain galgá leat iežaset heahtegearggusvuođafoanda, muhto jus foandda ruđat eai juovsse, dalle sáhttá ohcat ruđaid dan guovddášfoanddas.
Sara muitala sin orohat lea ohcan doarjaga.
– Orohat 16 lea ohcan doarjaga stáhtas. Sávvamis sii meannudit ohcama nu jođánit go vejolaš, go mis lea heahtedilli, dadjá Sara.
Čoahkkin departementtain
Ingolf Balto muitala heahtedili galget dieđihit departementii, ja doppe de gulaskuddet lea go heahtegearggusvuođafoanddas doarvái ruhta.
– Dal lea heahtegearggusvuođa olggosmáksin mearridan lasihit doarjaga 30c ja 30b:ai Guovdageainnus. Heahtegearggusvuođafoanddas lea ráddjejuvvon ruhta, nu ahte dat galggašii juhkkojuvvot vuoi buohkat ožžot veaháš doarjaga. Mii addit signálaid departementii ja galgá okta direktevra háleštit heahtedili birra. De oaidnit lea go doarvái ruhta foanddas, dadjá Balto
– Doallan oktavuođa
Orohat 16 lea váldán oktavuođa fylkkamánniin jearrat movt sii čovdet geaseheami orohagaide mat lea guhkkin eret.
– Muhtun siiddaide lea guhkes gaskka márkanis dohko gosa geasehit suinniid. Mii leat doallan oktavuođa fylkkamánnii Ingolf Baltoin guđe láhkai lea buoremus oažžut liigebiepmu orohagaide, dadjá Sara.
Liige suoinnit
John Anders Sara hástá vel boanddaid geain lea liigesuoinnit, dieđihit fylkkamánni Ingolf Baltoi, vuoi siiddat sáhttet biepmat bohccuid.
