Duorastaga rájes sáhttá bargoheaitta álgit stádas, mii čuohcá Norgga árktalaš universitehtii Romssas.
Juste dál leat váldotariffa šiehtadallamat stádas ja bargiidservviin. Mearri lea ollet ovttaoaivilvuhtii gaskaidjii. Jus eai šatta ovttaoaivilii, de mannet 75 bargi Norgga árktalaš universitehtas (UiT) bargoheaitagii duorastatiđida.
Skuvlla oahppit, geat galget eksámena čađahit, galget boahtit skuvlii nu go lea plána, čállá universitehta neahttasiiddus preassadieđáhusas.
UiT siiddus gávdnojit eanet dieđut studeanttaide ja bargiide maid galget bargat jus šaddá bargoheaitta.
Besset dušše hivssegis fitnat
Jus šaddá bargoheaitta, de ferte bargoaddi čuovvut sierra njuolggadusaid.
Jođiheaddji sáhttá dábálaččat doaimmahit barggu maid bargi gii lea bargoheaitagis láve bargat, muhto ii sáhte dábálaččat bidjat eará bargiid doaimmahit dan barggu.
– Bargit, geat leat bargoheaitagis, eai galgga beassat manadit sin bargolanjain, čoahkkinlanjain, boradanlanjain ja oktasaš bargiidlanjain. Hivssegiin besset finadit, eai ge dárbbat addit čoavdagiid bargoaddái. Die leat muhtin njuolggadusat maid UiT namuha preassadieđáhusas.
