-Almmuhus-
-Almmuhus-
-Almmuhus-
OĐĐASATSáhttá šaddat bargoheaitta NRKs - čuohcá Eurovision finálii

Sáhttá šaddat bargoheaitta NRKs – čuohcá Eurovision finálii

-

-

Odne álggii LO Stat ja Spekter šiehtadallat bálkkáid NRKs. Jus ii leat ovttaoaivilvuohta odne, de šaddá bargoheaitta NRKs ja 685 NRK-bargit bisánit bargamis.

– Mii geahččalit álo gávdnat čovdosa, muhto mieđihan ahte mis lea stuora gaskka. NRK áigu billistit bálkkávuogádaga ja verrodaga bidjat johtui. Jus NRK ii gease gáibádusaid ruovttoluotta, de sáhttá šaddat bargoheaitta, lohká LO Stat šiehtadallanjođiheaddji Lise Olsen preassadieđáhusas.

LO Stat soabadallá Norsk Tjenestemannslag miellahtuid ovddas ja Musihkkáriid searveorganisašuvnna miellahtuid ovddas.

 

NRK áigu rievdadit bálkávuogádaga

NRKs leat guokte bálkávuogádaga. NRK jođiheapmi sihtá guhtta iešguđet bálkávuogádaga. Gáibádusain rievdada NRK njuolggadusaid.

– NRK áigu álggahit vuogádaga mii ii geahča makkár bargu dus lea dahje makkár virgi dus lea. Mii eat sáhte dušše geahččat ahte sii geain unnimus bálká galget leat mielde lasihit bálkká sis geain jo lea alla bálká. Eat ge sáhte dohkkehit ahte seamma barggu ovddas galget goabbatlagan bálkkát leat, dadjá Lise Olsen.

 


 LO Stat šiehtadallanjođiheaddji Lise Olsen

 

Váikkuha sidjiide geain unnimus bálká lea

Sis geain ii leat nu alla bálká sáhttet bázahallat bálkká ektui dramáhtalaččat.

– NRKs leat sullii 60 ámmátkategoriija. Ođđa bálkávuogádat dagaha ahte guovttis geat bargaba seamma barggu sáhttiba dinet goabbat ládje, ja earru sáhttá dušše stuorrut jagis jahkái, muitala Lise Olsen.

 

Fertejit mearrat ovdal gaskaija

Oktiibuot leat 1700 NJ-miellahtu ja 685 LO-miellahtu geat sáhttet šaddat mielde bargoheaitagii. Áigemearri soabadit lea gaskavahkku diibmu 00.00.

NRK bargoheaitta váikkuha erenoamážiid njuolggosáddagiid radio ja TV bokte.

 

Eurovision-finála lávvordaga miessemánu 14.beaivvi, 17.mai ávvudeapmi ja EM-spábbačiekčangilvvut sáhttet sáddejuvvot kommeanttabargiid haga, jus bargoheaitta bistá.

-Almmuhus-