Politiijadirektoráhta evalueremis dorvoohcciidmeannudeami birra Storskogas, boahtá ovdán ahte eai doarvái bures ádden Nuorta-Finnmárkku báikkálaš dili.
Politiijadirektoráhta evalueremis dorvoohcciidmeannudeami birra Storskogas, boahtá ovdán ahte eai doarvái bures ádden Nuorta-Finnmárkku báikkálaš dili.
– Vuosttažettiin de lea mu mielas hirbmat buorre go Politiijadirektoráhta lea dahkan dákkár evaluerema. Mu mielas dat čájeha ahte lea dáhttu oahppat, lohká Finnmárkku politiijaguovllu politiijameašttir Ellen Katrine Hætta NRK:i.
Sávvá politiijadirektoráhta oahppat dás
Gaskavahkku gárvánii Storskog-rapporta man leat gohčodan «Guhkes roassu – dorvoohcciid boahtin Storskog rájá bokte – 2015 čavčča vásáhusat» dahje dárogillii «Den langsomme krisen – asylankomster over Storskog grensepasseringssted – erfaringer fra høsten 2015».
Hætta oaivvilda gearggusvuođa leat deháleamos čuoggán raporttas, ja son sávvá ahte ohppet dáhpáhusain.
Eai ádden doarvái bures
Raporttas boahtá maiddái ovdan ahte dat go eai doarvái bures ádden Nuorta-Finnmárkku báikkálaš dili, lea oassin sivas dasa go golai badjel mánnu ovdal go Politiijadirektoráhtta áddii man duođalaš dilli Storskogas lei.
– Go čohkkát Finnmárkkus, de leat guhkes gaskkat min politiijabálvváid gaskkas, vaikke leat olusat oktiibuot. Mun ádden ahte sáhttá leat váttis govahallat min operašuvdnaguovllui olbmuide geat čohkkájit «máddin». Dán evaluerema maŋŋil soitet guldalit boahtte háve go muhtin politiijameašttir buktá dieđiháhusa, lohká Hætta.
2015:i čavčča bohte oktiibuot 5.500 dorvoohcci Norgii Ruošša bokte.
