-Almmuhus-
-Almmuhus-
-Almmuhus-
KULTUVRASáhttá jienastuvvot davviriikkaid buoremus dokumentárafilbman

Sáhttá jienastuvvot davviriikkaid buoremus dokumentárafilbman

-

-

Dokumentára sámi ráppára SlinCraze birra oažžu eanet ja eanet fuomášumi. Dál lea evttohuvvon vuoitit dokumentárabálkkašumi Cinema Scandinavia Award:s. Son gilvala earret eará «Snåsamannenin», Magnus Carlsenin ja Zlatan Ibrahimovicain. Vuoiti sáhttet buohkat jienastit.

Filbma «Arctic Superstar» lea evttohuvvon vuoitit dán jagáš dokumentárabálkkašumi Cinema Scandinavia Award:s.

Arctic Superstar lea dokumentárafilbma sámi ráppára Nils Rune Utsi birra.

Filbmejeaddjit leat čuvvon Nils Rune Utsi, dahje SlinCraze, njeallje jagi, ja filmmas oaidnit movt son geahččala birget ráppárin.

 

Snåsamannen ja šáhkkameašttir

Arctic Superstar lea okta 20 filmmas mat leat evttohuvvon vuoitit bálkkašumi.

Filmmat leat iešguđet davviriikkain ráhkaduvvon, Norggas, Ruoŧas, Suomas, Danmárkkus, Islánddas ja Fearasulluin.

Eará filmmat leat earret eará Snåsamannen Joralf Gjerstad birra, spábbačiekči Zlatan Ibrahimovic, ja šáhkkameaštára Magnus Carlsena birra.

 

Buoremus árvvoštallan

Gii vuoitá bálkkašumi mearriduvvo olbmuid jienaid vuođul.

Cinema Scandinavia Award neahttasiidduin sáhttá jienastit guhte filbma galggašii vuoitit.

Cinema Scandinavia filbmaárvvoštallit leat árvvoštallan buot filmmaid, ja Arctic Superstar lea filbma mii lea ožžon buot buoremus árvvoštallama.

Sii leat árvvoštallan buot filmmaid ja addán čuoggáid gaskal 0 ja 5.

Arctic Superstar filbma lea ožžon 4,85 čuoggá, ii ge okta ge filbma leat ožžon eambbo.

 

Olu rámi ožžon

Filbma mázelačča birra lea ge ožžon olu fuomášumi ja rámi muđui maid.

Filmma birra čállo ahte lea filbma man lea bággu geahččat jus lea vejolašvuohta. Olgoriikkamediat leat oaidnán filmma ja rámpon dan.

Cinema Scandinavia čállá ahte lea olu girjáivuohta dán jagáš Davviriikkalaš filmmain, mat leat evttohuvvon bálkkašupmái:

– Skandináva filmmat ovdánit jođánit, ja leat šaddame máilmmi gievrramus industriijan.

 

Jienasteapmi bistá gitta skábmamánu 24. beaivái, ja vuoiti almmuhuvvo juovlamánu ja ođđajagimánu Cinema Scandinavia bláđis.

-Almmuhus-