Guovdageainnu dievddu bealušteaddji lohká su klieantta šaddan várjalit iežas, ii ge loga siválažžan goddimii mii dáhpáhuvai Skiellet báikkis golggotmánu 9.beaivvi.
Guovdageainnu dievddu bealušteaddji lohká su klieantta šaddan várjalit iežas, ii ge loga siválažžan goddimii mii dáhpáhuvai Skiellet báikkis golggotmánu 9.beaivvi.
Dát galgá leat dáhpáhuvvan golggotmánu 9. beaivvi.
Suodjalii iežas
Guovdageainnu dievddu bealušteaddji, Jens Nystrøm, J. N. Advokatbyrå AB advokáhtta fitnodagas, muitala ahte su klieanta čuoččuha šaddan várjalit iežas go ruoŧŧelaččat vigge sus rivvet ruđa.
Son muitala ahte dan oktavuođas de dáhpáhuvai nu ahte nubbi dievdu hávváduvvui ja jámii.
Politiijat eai kommentere dieid beliid Ávvirii, muhto lohket ahte ahte okta dain dievdduin lea mieđihan ahte áigo rievidit ruđa Guovdageainnu dievddus ja su olbmás.
Advokáhtta iige sáhte dadjat maidege geas dat niibi lea leamašan mainna Ruoŧa dievdu hávváduvvui ja jámii.
– Mu klieanta čuoččuha iežas várjalan, ja dan geažil ii ge leat sivalaš vearredagu dahkan, lohká Nystrøm.
(Ášši joatká gova vulobealde)
Nanne čilgehusa
Nubbi dain Ruoŧa dievdduin lea politiijaide mieđihan ahte sis lei jurdda rivvet Guovdageainnu dievddu ruđa, ja de lea maid beassan luovos giddagasas, go ii leat šat ballu son galgá sáhttit bilidit politiijaid dutkama.
– Dat nanne mu klieantta čilgehusa go nubbi Ruoŧa dievdu lea mieđihan galgan rivvet mu klieantta ruđa, muitala son.
Ášši áktor Andreas Nyberg ii sáhte dadjat lea go goddin dáhpáhuvvan dan oktavuođas go Guovdageainnu dievdu galgá viggan iežas gádjut.
Buoret guvlui
Nystrøm muitala ahte su klieanttas lea lossa dilli, muhto lea buoret guvlui manname dál.
Son muitala klieanta ii beasa ovttain ge eambbo suinna ja giddagasbargiiguin hupmat, ja dat gártá lossadin sutnje.
Son ipmirda dáhpáhusa mii lea geavvan, muhto ii loga iežas dasa sivalažžan go nu lea dáhpáhuvvan.
– Jáhkán áššáskuhttineiseválddiid ipmirdit dan ahte son ii leat dahkan eará go iežas várjalan dan dilis, ja mus lea buorre jáhkku ahte son beassá luovos maŋŋel skábmamánu 23. beaivvi, lohká son.
(Ášši joatká gova vuolábealde)
Addit áiggi
Guovdageainnu dievdu lea dál háldogiddagasas Ubmis, Ruoŧas, ja galgá jáhkkimis doppe leat gitta skábmamánu 23. beaivvi rádjái.
– Mii addit politiijaide dál áiggi bargat, go Skiellet diggegoddi lea bidjan su háldogiddagassii dan rádjái, nu ahte moai ean vikka šat oažžut su luovos ovdal dan áiggi, muitala Nystrøm.
Sámegiel dulka
Nystrøm muitala ahte visot lea mannan bures čilgemiin giela dáfus, go sis lea leamašan dárogieldulka.
– Jus diggi šaddá, dalle áigo moai váldit sámegieldulkka, muitala son.
Guovdageainnu dievddus lei olmmái mielde, okta goalmmátlot-jahkásaš dievdu, geas maid lea gullevašvuohta Guovdageidnui, muhto ii oro doppe.
Son lei álggos giddagassii maid biddjon, muhto beasai johtilit luovos go ii galgga leat makkárge oktavuohta sus leamaš dan Ruoŧa dievddu jápmimii.