Dieđihanáigemearri spábbačiekčamiidda guhkiduvvo ja lágideaddji sávvá eambbo spábbačiekčanjoavkkuid searvat gilvvuide.
Ávvir Cup lágiduvvo juovlamánu 4. ja 5. beaivvi ja dieđihanáigemearri lahkonišgoahtá. Skábmamánu 15. beaivvi lei áigemearri dieđihit joavkku spábbačiekčamiidda, muhto dál lea lágideaddji guhkidan áigemeari bearjadahkii skábmamánu 19. beaivái. Guovdageainnu Báktehárjjis galget spábbačiekčamat lágiduvvot ja dohko lávejit spábbačiekčit miehtá Finnmárkku čoahkkanit.
– Mii leat guhkidan áigemeari bearjadahkii, go mii háliidit eambbo joavkkuid. Sávvat ahte eambo joavkkut bohtet mielde, dadjá Janne Eilen Mienna Guttorm, Ávvir Cup lágideaddji.
Suohttasit jus eambbosat servet
Dássážii leat 12 dievdojoavkku ja njeallje nissonjoavkku dieđihan searvat Ávvir Cupii.
– Mii sáhttit čađahit gilvvuid nu movt dál lea, muhto lea dieđusge suohttasat jus veahá eambo joavkkut servet. Erenomážit nissonjoavkkuid sávvat mii ahte eambbosat servet, dadjá lágideaddji.
Árvvoštallet koronadili
Lágideaddji muitala ahte sii leat maŋimuš čoahkkimis mearridan ahte spábbačikčiid giehtabáttiin galgá earálágan ivdni go earáid. Lágideaddji galgá sirret gos leat spábbačikčiid čohkkánsajit ja gos geahččit sáhttet čuovvut mielde čiekčamiid.
– Mii dahkan ain ođđa árvvoštallamiid ja maiddái ságastit suohkandoaktáriin, gulaskuddat maid son oaivvilda. Mii fertet ain dađistaga árvvoštallat, loahpaha Mienna Guttorm.
Nilut Cup maŋisboahtti
2019:s lágiduvvui Ávvir Cup vuosttaš geardde. Dan ovdal lávii Nilut Cup namma dan spábbačiekčanlágideamis. Turneringa namma rievddai dan dihte go Nilut Joavku ii šat áigon lágidit spábbačiekčangilvvuid.
