Dál lea vejolaš šaddat «2020 Finisher» vaikko vel Offroad Finnmark ii lágiduvvo dán jagi.
Koroandilálašvuođa geažil ii lágiduvvo dán jagi Offroad Finnmark. Muhto, dál leat lágideaddjit hutkan vuogi mo goitge sáhtát searvat sihkkelastingilvui ja oažžut namahusa «2020 Finisher». Dán geasi sáhtát namalassii searvat Offroad 150 (OF150) dalle go dutnje heive buoremusat.
– Gaskal suoidnemánu 25. beaivvi ja borgemánu 2. beaivvi sáhttá sihkkelastit DNB OF150, ja sii geat čađahit dán sihkkelastema, ožžot dohkkehuvvot «finisherstáhtusa» ja dasa lassin ožžot oasseváldit «finisherbáiddi», dieđiha Offroad Finnmark sin Facebook-siiddus.
Simulerejuvvon gilvu maŋŋel
Áigemihtidanrusttegiiguin, maid juohke sihkkelasti ferte geavahit, sáhttet lágideaddjit dohkkehit áiggiid, ja maiddái maŋŋel gilvvuid lágidit nu gohčoduvvon «simulerejuvvon gilvvu».
OF 150 láhttu lea 150 km guhku ja lágideaddjit lohket dan bures heivet easkkaálgiide, muhto maiddái sihkkelastiide geat háliidit garra gilvui searvat.
