Mátketelefovnnain ii leat lohpi hupmat vuojidettiin, ja dan ovddas sáhkkohalai biilavuoddji odne ja oaččui maid čuoggáid.
Biilavuoddji válddahalai Hámmárfeasttas go humai telefovnnain vuojidettiin. Dan ovddas son oaččui 1700 ruvnno sáhku ja guokte čuoggá vuodjinkortii.
Dieđát go man olu čuoggáid oaččut vuodjinkortii iešguđetge láhkarihkkuma geažil?
Ná čállá Stáhta geaidnodoaimmahat iežaset siiddus:
2 čuoggá oaččut jus dáid lágaid rihkut:
– Vuoját gaskal 11 ja 15 km/d jođáneappot go lea lohpi luottas gos lea leahttomearri 60 km/d dahje unnit.
– Vuoját gaskal 16 ja 20 km/d jođáneappot go lea lohpi luottas gos lea leahttomearri 70 km/d dahje eambbo.
– It leat biilaboahkána bidjan passašerii gii lea 15 jagi dahje nuorat.
– mátketelefovnnain humat vuojidettiin.
3 čuoggá oaččut jus dáid lágaid rihkut:
– Vuoját 16 km/d jođáneappot go lea lohpi luottas gos lea leahttomearri 60 km/d dahje unnit.
– Vuoját 21 km/d jođáneappot go lea lohpi luottas gos lea leahttomearri 70 km/d dahje eambbo.
– It doahttal rukses čuovgga čuovgaluoddaearus.
– Lobihemiid vuoját meaddel nuppi.
– It doahttal vuordingeatnegasvuođa.
– Vuoját báikkis mii lea giddejuvvon.
– Vuoját beare lahka biilla mii du ovddabeale vuoddjá.
– Jus leat lasihan lobihemiid eambbo mohtorfámo mohtorsihkkelii dahje mopedii.
Jus golmma jagis leat ožžon gávcci čuoggá, de massát guđa mánnui vuodjinkoartta.
