-Almmuhus-
-Almmuhus-
-Almmuhus-
OĐĐASATSágat lea duđavaš lassánan deaddilan­loguin, muhto lea beahtahallan Ávvira loguin

Ságat lea duđavaš lassánan deaddilan­loguin, muhto lea beahtahallan Ávvira loguin

-

-

Olles 148 deaddileami earuhit guovtti sámi aviissa.

Mediebedriftenes Landsforening ja Landslag for lokalaviser leat dál almmuhan olles Norgga aviissaid deaddilanloguid. Das leat rehkenastán juohke aviissa deaddilanloguid 2020 nuppi jahkebealis 2021 nuppi jahkebeallái.

Ságat aviissas leamaš buorre lassáneapmi jahkebealis, ja dainna lea váldodoaimmaheaddji movttet:

– Mii leat ilus go Ságat aviissas dađistaga lassána lohkkiidlohku. Mis han lei smávva njiedjan vuosttaš jahkebealis, muhto dan leat nagodan njulget ja vel dasa lassin lasihit, dadjá Ságat aviissa váldodoaimmaheaddji Geir Wulff.

Lassánan digitálalaččat

2020 nuppi jahkebealis lei Ságat aviissas deaddilanlohku 3024, ja lassánii 92 deaddilemiin 2021 nuppi jahkebeallái. Váldodoaimmaheaddji muitala ahte Ságat aviissa strategiija lea sin mielas doaibman. 

– Mii leat nagodan doalahit báberaviissa loguid, dan botta go lea lassánan digitálalaččat. Mii eat háliidan fuonidit báberaviissa vaikke vel leat áŋgiruššan eambbo digitála aviissa márkanfievrrideami. Leat hui duđavaččat go čájehuvvo ahte doalahit báberaviissa abonnemeanttaid, dadjá Wulff.

Beahtahallan Ávviris

Ságat váldodoaimmaheaddji lea muđui maid ilus go loguin čájehuvvo ahte smávva báikkálaš aviissat birgejit bures, muhto sutnje lei hirpmástuhtti go Ávvira aviissa deaddilanlohku lea njiedjan.

– Lean beahtahallan Ávviris go lea njiedjan, dan dihte go mu mielas lea aviisa dađis šaddan buoret. Lei mu mielas hirpmastuhtti njiedjan. Mun doaivvun ahte lea dušše gaskaboddosaš njiedjan ja ahte Ávvir nagoda buoridit dan boahtte jahkebealis, dadjá Ságat váldodoaimmaheaddji, Geir Wulff.

– Áigut njulget logu

2020 nuppi jahkebealis lei Ávvir aviissa deaddilanlohku 1269. Lohku lea njiedjan 51 deaddilemiin 2021 nuppi jahkebeallái. Ávvira váldodoaimmaheaddji, Kari Lisbeth Hermansen, doaivu nagodit njulget logu.

– Dát leat jahkebeallogut ja mii jahkkit ahte lea variašuvdna jahkebealis jahkebeallái.  Mii jáhkkit ahte nagodat njulget boahtte jahkebeallái. Mii dieđusge eat leat movttegat loguin, muhto go máilbmi lea rahppon, de sáhttit eambbo digitála fálaldagaid fállat min lohkkiide ja maid muđui buoridit min sisdoalu. Mii sávvat oažžut lohkkiid ruovttoluotta ja dieđusge maid ođđa lohkkiid, dadjá Ávvira váldodoaimmaheaddji, Kari Lisbeth Hermansen.

HEAJOS LOHKU: Ávvira váldodoaimmaheaddji, Kari Lisbeth Hermansen, doaivu nagodit njulget 2021 nuppi jahkebeali loguid boahtte jahkebeallái. Preassagova govven: Nils Johan Vars.
HEAJOS LOHKU: Ávvira váldodoaimmaheaddji, Kari Lisbeth Hermansen, doaivu nagodit njulget 2021 nuppi jahkebeali loguid boahtte jahkebeallái. Preassagova govven: Nils Johan Vars.

Lassáneamit

iTromsø aviissas lea leamas stuorámus lassáneapmi deaddilanloguin. 2020 nuppi jahkebealis lei iTromsø aviissas deaddilanlohku 8205, mii lassánii 619 deaddilemiin 2021 nuppi jahkebeallái. Báikkálaš aviissain lea maid leamaš stuorra lassáneapmi. Altaposten lea lassánan 240 deaddilemiin, Hammerfestingen 228 ja Harstad Tidende fas 174 deaddilemiin.

Njiedjan

Nordlys aviisa lea vásihan stuorámus njiedjama Romssa ja Finnmárkku aviissain. 2020 jahkebealis ledje aviissas 26 315 deaddileami, muhto 2021 jahkebeallái njiejai lohku olles 694 deaddilemiin. Svalbardposten aviissas lea njiedjan 187 deaddilemiin. Finnmarksposten deaddilanlohku lea njiedjan 60 deaddilemiin.

Romssa ja Finnmárkku aviissaid logut 

(Logut leat rehkenaston 2020 nuppi jahkebealis, 2021 nuppi jahkebeallái.)

· Nordlys: -694

· Harstad Tidende: +174 

· iTromsø: +619 

· Finnmark Dagblad: -29

· Finnmarken: +155

· Folkebladet: +175

· Altaposten: +240

· Framtid i Nord: +6

· Nye Troms: -15

· Ságat: +92

· Kyst og Fjord:  -48

· Sør-Varanger Avis: -6

· Svalbardposten: -187

· Kronstadposten: -2

· Finnmarksposten: -60

· Hammerfestingen: +228

· Ávvir: -51

· Østhavet: +5

-Almmuhus-