SÁNAG, Sámi klinihkka fállá ságastallamiid boazodolliide geat leat fuolastuvvan dála boazodoalu geažil. Boahtte vahkku rájes álggahit sii sierra telefovdnafálaldaga mánáide/nuoraide ja ollesolbmuide boazodilis. Fálaldat lea olles riikii.
Boazodoallit vásihit dál golmmageardásaš roasu, namalassii koronavirusa, heajos guohtuma ja boraspirehástalusaid. Sivva heajos guohtumii lea erenoamáš ollu muohta, mii dagaha ahte bohccot eai ole jeageleatnamii. Dat dagaha ahte bohccot jápmet nealgái. Boazodoallin leat lassigolut heajos guohtumiid geažil go gártet oastit fuođđariid. Dát dilálašvuohta sáhttá čuohcat sihke psyhkalaččat ja ekonomalaččat.
– Dán vuođul lea SÁNAG, Sámi klinihkka ovttasráđiid NBR:in álggahan telefovdnafálaldaga, gos fállet neavvuma ja ráđđeaddima mánáide, nuoraide ja ollesolbmuide geat rahčet. Neavvuma ja ráđđeaddima sáhttá oažžut davvisámegillii dahje dárogillii, ja sáhttá maid šiehtadit Skype-čoahkkima, čállá SÁNAG klinihkkahoavda Amund Peder Teigmo preassadieđáhusas.
