Tjaktjen Tjåanghkoe lullisámi festiválas leat čalmmustahttán musea jorbabeaivvi.
Guovvamánu dan jagi devddii ásahus 60 jagi. Dan leat ávvudan mannan lávvordaga Snåasas Tjaktjen Tjåanghkoe festiválas.
Saemien Sijte direktevra Birgitta Fossum logai iežas sártnis earret eará man deahálaš doaibma lea ásahusas, ahte lea sihke deaivvadanbáiki, báiki gos olmmoš sáhttá háhkat máhtu, hupmat iežas giela ja oaidnit máttuid dávviriid.
– Mun jáhkán das lea duođai stuorra mearkkašupmi olbmuid ipmárdussii historjái ja identitehtii, logai Saemien Sijte direktevra Birgita Fossum doaluin.
– Servodahkan mun sávan, ahte mii leat ollen olu viidáseappot iežamet dekoloniserenproseassas. Ahte mis duođaid lea fápmu mearrádusain. Mii guoská museai, de sávan ahte mis leat unnimusat seamma eavttut go Norgga museain, logai son.
Dan dieđiha NRK Sápmi
