Bartasearvi lea guhká cakkadan njeaidima. Muhto dál šaddá nugo Biebmobearráigeahčču ja boazodoallu lea gáibidan.
Bartasearvi lea guhká cakkadan njeaidima. Muhto dál šaddá nugo Biebmobearráigeahčču ja boazodoallu lea gáibidan.
Gjerdvassbu barta lea badjel 40 jagi boaris, birrasiid 650 m ábi bajábealde Unna Vákkážis, oarjjabealde Goalsevári čohka Ivgus. Go bartasearvi suoidnemánus diibmá rabai nuppi bartta, áibbas ođđa Rørnesbartta kilomehtera vuollelis lei eaktun ahte boares barta galgá jávkaduvvot ovdal čakčamánu 2013. Muhto barta lea ain ceaggáme.
Healbadan iešmielat
Bartasearvi ozai beassat bisuhit boares bartta, muhto ohcamuš lea hilgojuvvon. Dál lea suohkan hoahpuhan searvvi gaikut dan boares bartta.
– Lea váivi go šaddat njeaidit dan, ja mii leat ieža danne healbadan gaikuma. Muhto dál ii leat šat áhpu. Leat skuteriiguin geasehišgoahtán lossa dávviriid vulos, muitala searvvi jođiheaddji Bente Rognli.
Áiggošii gal juoidá dohko
Gjerdvassbu bartta eai leat doallan ortnegis, ii ge doppe sáhte orrut. Dat jovgo maid visot dálvet. Rognli lohká goitge oallugiid vánddardit dohko. Dál háliidivččii son juobe geađgevisoža dahje goavddi ge hukset boares bartta sadjái.
– Mun in leat ožžon albma vástádusa go lean viggan jearahit boazodoallis Johan Mathis Turis eat go sáhte soahpat bisuhit boares bartta, dadjá Rognli Ávvirii.
Son muitala ahte sii leat ohcan ođđa bartta stuoridit, muhto dan ohcamuša ii meannut suohkan ovdal go leat ollašuhttán gaikuma.
Framtid i nord aviisa dat čálii álggos dán ášši birra.
Nuoskkida čázi
Dát barttat lea lahka Ivgomuotkki čáhcegáldu. Danne ballá ge Biebmobearráigeahčču ahte juhkančáhci billahuvvá go leat guokte bartta dan guovllus, ja gáibidedje boares bartta gaikkoduvvot. Ođđa barta lea vehá guhkkelis čáhcegáldu.
Ii dohkket sivahallama
Ii boazodoallu ge leat leamaš mielas máŋga bartta bisuhit sin guohtuneatnamiin. Boazodoalli Johan Mathis Turi Ivguláhku orohagas imaštallá go bartasearvi ii báljo gáro jávkadit bartta, vaikko sis lea šiehtadus.
– Mii dohkkeheimmet dalle ahte ožžot ođđa bartta cegget vehá vuollelii dan vákkis go gaikot dan nuppi bartta badjelis. De ii leat mu mielas rehálaš sivahallat boazodoalu. Lean vehá hirpmáhuvvan go medias boahtá ovdan dákkár biehkun, dadjá Turi Ávvirii. Son ii loga gillet mediaid bokte gulahallat bartaservviin.
Eanet vánddardeapmi
Turi muitala ahte barttat leat gasku sin guohtuneatnama. Boares barta lea vákkis gos eallu láve bálgat, muhto Turi ii loga dássážii leat vánddardeami leamaš giksin.
– Ođđa barta dieđusge buktá eambbo vánddardeami, muhto mii soabaimet goit ahte sáhttet hukset ođđa bartta áibbas ođđa báikái, dadjá son.
