-Almmuhus-
-Almmuhus-
-Almmuhus-
OĐĐASATOhcet vel guhkit doallat skohter­máđijaid rabas

Ohcet vel guhkit doallat skohter­máđijaid rabas

-

-

Guovdageainnu suohkan lea sádden ohcamuša doallat skohtermáđijaid vel guhkit rabas.

Álggos miessemánu ozai Guovdageainnu suohkan guhkidit skohtermáđijaid áigodaga miessemánu 17. beaivái, ja Fylkkamánni mearridii doallat skohtermáđijaid rabasin miessemánu 17. beaivái.

Suohkana bealis lea dál Guovdageainnu meahcástanlávdegotti jođiheaddji Vegard Olsen sádden ohcamuša guhkidit skohtermáđijaid áigodaga Guovdageainnu suohkanis. 

– Mii leat sádden ohcamuša Fylkkamánni ahte oažžut guhkidit Guovdageainnu suohkana skohtermáđijaid áigodaga, go leat olusat jearahan mus áigu go suohkan ohcat guhkidit skohtermáđijaid áigodaga, muitala Olsen. 

Olu muohta ja dálvvas

Olsen lea ságastallan telefovnna bokte Fylkkamánni birasdirektevrrain Bente Christianseniin. Sus lea ipmárdus ahte dál lea olu muohta ja lea ain dálvvas olu báikkiin, muhto son logai ahte ii soaitte leat vejolaš rahpat buot máđijaid maid suohkan oaččui guhkiduvvot miessemánu álggus. 

Dál lea suohkan ohcan guhkidit skohtermáđijaid áigodaga miessemanu 24. beaivái. 

Skohtermáđijat maid leat ohcan guhkiduvvot: 

Máđidja 3, Sihččejávri luoddaearus Suolojávrái

Máđidja 4, Siebes Sihččejávrái

Máđidja 5, Guovdageainnus Nammajávrái

Máđidja 14, Guovdageainnus Čuonjajávrái

Máđidja 19, Mironjávrris Geašjávrái

Máđidja 21, Mázes Stuoraoaivái

Máđidja 22, Stuoraoaivvis Čárajávrái

– Garra áigi buohkaide

Bente Christiansen muitala ahte sii leat ožžon ohcamuša suohkanis. Christensen muitala maid ahte sii meannudit ohcamušaid mat gullet Romssa beallai maid, nuvt sis leat olu ohcamušat maid galget meannudit. 

– Mus lea leamaš čoahkkin inšenevrrain, Anders Tandbergain, ja moai letne hupman olu dan birra. Vuođđun dasa go lea mohtorjohtolatláhka lea dan dihte go ferte váldit vuhtii luondduvalljivuođa ja elliidčálggu, go dát dálvi lea leamaš ja lea ain garra áigi buohkaide, muitala Christiansen. 

Christiansen dadjá maid ahte ii leat muohta ja dat ahte lea ain dálvvas mii mearrida besset go guhkidit skohteráigodaga. 

Lohpadus

Vegard Olsen muitala ahte son fertii lohpidit guokte diŋgga Fylkkamánnii jus skohteráigodat galgá guhkiduvvot. 

– Mun lohpidin Fylkkamánnii ahte vieččan gulaskuddancealkámuša dain orohagaid geain sáhttet leat bohccot dain báikkiin gosa leat ohcan guhkiduvvot skohtermáđijaid áigodaga, muitala Olsen ja lasiha vel: 

– Suohkana bealis lean maid lohpidan ahte suohkan váldá ovddasvástádusa giddet skohtermáđijaid jus siivu rievdá dahje šaddá váttisvuohtan bohccuide ja eará elliide. 

-Almmuhus-