Sámediggi lea dál dáhtton Inkássofitnodaga gáibidit Sámit Lulli-Norggas máksit ruovttoluotta váile 75 000 ruvnno.
Sámediggi lea dál dáhtton Inkássofitnodaga gáibidit Sámit Lulli-Norggas máksit ruovttoluotta váile 75 000 ruvnno.
Sámediggi lea 2013 jagi rájes gáibidan Sámit Lulli-Norggas listtus ruovttoluotta máksit bellodatdoarjagis váile 75 000 ruvnna. Sámedikki dievasčoahkkinjođihangoddi dat meannudii 08.09.14 čoahkkimis dán ášši mas konstaterejedje ahte Sámit Lulli-Norggas ii leat válljejuvvon sisa Sámediggái áigodahkii 2013 -2017.
Gáibide eanas oasi máksot
Dievasčoahkkinjođihangoddi čujuhii dasto viidáseappot Sámediggejoavko- ja opposišuvdnaruđaid njuolggadusaide maid olis gáibidedje Sámit Lulli-Norggas máksit ruovttoluotta 73 117 ru geavatkeahtes ruđa 2013 juolludusas Sámedikki politihkaš joavkkuide.
Seammás deattuhuvvui čoahkkimis ahte Sámit Lulli-Norggas lea ožžon 96 295 ruvnnu máksojuvvot doarjjan politihkalaš joavkkuide jagi 2013 várás. Dán mávssus lea dievasčoahkkinjođihangoddi dohkkehan oktiibuot 23 178 ruvnno goluid.
Danne dáhtto ahte 73 117 ruvnno sturrosaš rehket máksojuvvo maŋimusat 03.11.14.
Váidda proseassat dahkkon
Dán rájes lea leamaš ollu čálašeapmi. Sámit Lulli-Norggas eai leat dohkkehan gáibádusa go dulkojit eará láhkái njuolggadusaid. Sii leat čállán iežaset váidagis, ahte sin dulkoma mielde ii gáibiduvvo njuolggadusain ruovttoluotta máksot doarjja mii ii leat geavahuvvon vissis áigodagas. Sámit Lulli-Norggas čilgejit viidáseappot ahte sii leat geavahan ruđaid guhkit áigge badjel 2017 sámediggeválggaid ektui.
Váiddareivves daddjo maiddái Sámit Lulli-Norgga bealis, ahte joavkkoruđat leat geavahuvvon, ja ain geavahuvvojit Sámedikki guoski bargguide. Sis lea mihttu cegget listtu 2017 sámediggeválgii, ja danne áigot báhcán ruđaid vel geavahit sámi guoski áššiide ja gažaldagaide.
Inkássoi sáddejuvvon
Váiddaproseassat dán áššis leat čađahuvvon gitta 2014 rájes dán jagi borgemánu rádjái. Gáibádusa supmi lea lassánan dan rájes mottiin duhát ruvnnuin, nu ahte gáibádus lea dál 74 995 ruvnno. Sámedikkis eai leat váldán vuhtii Sámit Lulli-Norggas váidagiid dán proseassas.
Maŋemus reivves, mii lea giddejuvvon almmolašvuođas, boahtá vel ovdan, ahte dát ášši lea sáddejuvvon mannan vahkkus muhtun inkássofitnodahkii, mii dasto gáibidišgoahtá ruđa Sámit Lulli-Norggas. Sámediggi oaidná iežaset geargan dainna áššiin go lea sin bealis lea dahkkon loahpalaš mearrádus.
Mii deattuhat Sámi Lulli-Norggas (Samer bosatt i Sør-Norge) ii leat seamma listtu go Sámit lulde (Samer sørpå) mas lea okta áirras dál Sámedikkis.
