Dorvoohccit eai dárbbat šat máhccat Ruššii fas sihkkeliiguin.
Dorvoohccit eai dárbbat šat máhccat Ruššii fas sihkkeliiguin.
Finnmárkku politiijaguovllu politiijameasttir lea juovlamánu rájes čoahkkinastán Ruošša eiseválddiiguin movt buoremusat galgá sáddet dorvoohcciid sihkkaris vuogi mielde ruovttoluotta Ruššii Storskog rádjestašuvnna bokte.
Duhtavaš politiijameasttir
Ruošša eiseválddit leat miehtan ja duođaštan ahte olgoriikkalaš ássiid, geain lea dohkkehuvvon orrunlohpi dahje multivisum Ruoššas, oažžu sáddet fas Ruššii busse mielde.
– Mii leat duhtavaččat gulahallamiin Ruošša rádjeeiseválddiiguin geat leat ovttasbargan ahte dorvoohcciid sáhttá sáddet Storskog ráji badjel Ruššii buoremus ja sihkkareamos vuogi mielde, muitala Finnmárkku politiijameasttir Ellen Kathrine Hætta.
Duođašta
Finnmárkku politiija olgoriikaovttadaga prošeaktajođiheaddji Tor Espen Haga duođašta ahte áigot bussesáhtostallat go máhcahit olbmuid fas Ruššii.
– Busse mielde máhcahit olbmuid lea ollu buoret ja eanet oadjebas go sihkkeliiguin sihtat johtit, erenomážit dál dálvet, dadjá Haga. Sii geat máhcahuvvojit fas Ruššii galget sáddejuvvot báikái mii ii leat rádjeguovllus.
Dál, go máhcaheapmi galgá leat bussiid mielde, de ii leat šat dárbu vuorkut ja viežžat sihkkeliid go galget fas ruovttoluotta Ruššii, čállá Finnmárkku Politiijaguovlu.
