Mannan ija šadde Giehtaruohttasa boazodoallit goddit birrasii 70 bohcco iežaset gávpečorragis, go boazobiila vujii doarrás geainnus ja gopmánii.
Mannan ija šadde Giehtaruohttasa boazodoallit goddit birrasii 70 bohcco iežaset gávpečorragis, go boazobiila vujii doarrás geainnus ja gopmánii.
Mannan ija vujii boazobiila badjel geainnu ja gopmánii gaskal Guhttasa ja Gárasavvona Suoma bealde. Boazobiila, mii gullá Arctic Food biergofitnodahkii, lei viežžan gávpečorraga Saarikoskis, gos Giehtaruohttasa orohagas okta siida vuvddii čorraga. Boazobargi Nils Jonas Ketola muitala sii ledje lásten gávpečorraga boazobiilii go ožžo dieđu birrasii guovtti áiggi ahte boazobiila lea gopmánan.
– Boazobiila lei šaddan doarrás bonjastit, go geainnu alde lei olgoriikka guorbmebiila geassime bajás ovtta eará biilla. Lei juste dievá duohken ja boazobiila ii háhppehan goazastit. Nu manai doarrás ja boazobiilla ovdabiila gopmánii, muhto goallosjorri gal bisui ceaggut, lohká son.
Lossat oaidnit biinnu
Ketola muitala sii gohččojuvvojedje boahtit goddit lápmahuvvan bohccuid.
– Dáhtto boahtit boazoolbmuid goddit bohccuid, ja daid bohccuid mat ledje doppe šattaimet measta visot goddit. Ledje lagabui 70 bohcco maid gottiimet. Vaikko vel leimmetge vuovdán juo daid bohccuid, de goitge lei váivi ja lossat, ja measta ganjaldii vel olmmoš go šattai oaidnit iežas bohccuid biidnahuvvane, lohká son.
Ii sáhte leat leaika
Ketola lohká juo ovdalaččas huššan bohccuide biilla sisa biddjot, ii ge sáhte leaika hušša go vel gopmána biila.
– Dainna gal maiddái ieš hušša luvvo ja váibá. Dákkár lihkohisvuođa gal in udno oktiige vásihit, lohká son.
Ketola ii loga vel áibbas sihkarin movt šaddá, muhto oaivvilda sin ovddasvástádus bohccuide ravggai go boazobiilii lástejuvvojedje.
Soitet eanet šaddat goddit
Boazodoalli Ailu Juuso muitala sáhttet šaddat goddit vel eambbo go dan 70 maid dán rádjái leat goddán.
– Reasta gávpečora, mii lea vel báhcán, geasehuvvo Gihttelii, gos šibitdoavttir galgá iskat olles čorraga. Dat galgá de geahččat leat go eanet bohccot dan čorragis mat sáhttet leat lápmahuvvan, lohká Juuso.
Ilgat oaidnit
Matti Pääkkölä, gii jođiha Arctic Food fitnodaga, lohká Ávvirii dulkka bokte ahte sis lea dáhkádus mii gokčá sin vahágiid, muhto goitge lea oba ilgat oaidnit go ná dušše ja lápmahuvve bohccot.
