-Almmuhus-
-Almmuhus-
-Almmuhus-
OĐĐASATSádde Girkonjárgaášši Erenoamášovttadahkii

Sádde Girkonjárgaášši Erenoamášovttadahkii

-

-

Finnmárkku politiijameašttir lea mearridan sáddet politiijaid meannudeami ja oktavuođa dainna 37-jahkásaš nissoniin mii gávdnui goddon vuossárgga, Politiijaáššiid erenoamášovttadahkii.

– Dili vuođul ja daid gažaldagaid vuođul mat leat boahtán politiijaid oktavuođa birra 37-jahkásaččain ovdal goddima, lean gávnnahan ahte lea riekta sáddet ášši viidásat Politiijaáššiid erenoamášovttadahkii. Lea dárbbašlaš oažžut čuvgejuvvot leat go politiijat gieđahallan dili riekta, ja leat go mii dahkan doarvái áddet dili go leat leamaš oktavuođas nissoniin, lohká Finnmárkku politiijameašttir Ellen Katrine Hætta.

 

Politiijat moaittahallan

Politiijaáššiid erenoamášovttadat lea riikkaviidosaš dutkan- ja áššáskuhttineiseváldi.

Ovttadaga bargun lea dutkat áššiid gávnnahan dihtii leat go politiijat dahje áššáskuhttineiseválddit dahkan láhkarihkkumiid barggu oktavuođas.

Maŋŋil go 37-jahkásaš nisu ja su bárdni gottáhalaiga mannan vuossárgga, leat politiijat ožžon moaitagiid go čuoččuhuvvo ahte nisu lea leamaš singuin oktavuođas ja earret eará muitalan ahte vásihii psykalaš veahkaválddálašvuođa isidis.

Moaitit oaivvildit ahte politiijat ledje galgat doaibmabijuid bidjat johtui dán oktavuođas.

– Lea dehálaš ahte politiijat deaivvadit olbmuiguin dakkár vugiin mas nagodit fuomášit ja árvvoštallat vejolaš áittadiliid. Mii leat maŋimuš jagiid eanet atnán veahkaválddálašvuođa lagas birrasiin ja SARA-metodihka ásaheami guovddážis vai sáhttit árvvoštallat riskkaid ja bidjat doaibmabijuid doibmii, čállá politiijameašttir preassadieđáhusastis.

 

Bealátkeahtes árvvoštallan dehálaš

Finnmárkku politiijaguovlu lea olu bargan dainna ahte loktet fuomášumi veahkaválddálašvuhtii ja erenoamážit dasa mii dáhpáhuvvá lagasolbmuid gaskkas. Politiijameašttir čállá iežaset leamaš beroštuvvan das ahte galgá álkit šaddat hállat veahkaválddi birra ja movttiiahttán olbmuid bidjat rájáid dán oktavuođas.

– Dán dilis lea dehálaš sihke politiijaide ja servvodahkii ahte oažžut bealátkeahtes árvvoštallama Erenoamášovttadagas, das mo politiijat leat gieđahallan deaivvadeami 37-jahkásaččain, lohká Hætta.

-Almmuhus-