-Almmuhus-
OĐĐASAT– Šaddat dávjá fitnat dákkár báikkiin

– Šaddat dávjá fitnat dákkár báikkiin

-

-

Guovdageainnus leat luovosbeana gaikkodan vihtta bohcco odne, politiijat lohket olbmot galggašedje doahttalit veaddingeatnegasvuođa.

Odne iđđes gávnnai boazoeaiggát vihtta bohcco alddis maid luovosbeana lei gaikkodan gárddi siste Ákšomuotkis Guovdageainnus.

– Iđđes vulgen biebmat daid ja de gávdnen daid. Okta lei gaikkoduvvon jámas, guokte eará ges nu bahát ahte daid šadden goddit. Guokte eará bohcco maid leaba gaskkahallan, muhto dat soitet eallit. Ferten oažžut šibitdoaktára fitnat geahččamin daid, muitala boazoeaiggát Isak Mathis Utsi.

 

Ii leat ovdal bártidan luovosbeatnagiiguin

Sus ledje dát bohccot gárddis iežas oappá vieso luhtte, su oabbá dat lei ge dieđihan sutnje ahte lei gullan juoidá ja ahte okta boazu oidnui veallut, juolggit vel áimmus:

– Mun de vudjen njuolga gárddelusa. Doppe ii lean dalle gal šat mihkkege, dušše varra luottat ja beatnatluottat, muitala boazoeaiggát guhte ii duostta gal árvvoštallat lea go leamaš eambbo go okta beana.

Utsi ii loga iežas goassege ovdal vásihan dákkára, ii ge leat váivašuvvan luovosbeatnagiid geažil ovdal.

– Muhto dát gal lea veahá váivi. Mus gottii hearggi man ledjen biebman ja dápman, muitala son.

(Ášši joatká gova vuolábealde)


POLITIIJAIDE VÁIDÁN: Isak Mathis Utsi lea váidán dáhpáhusa politiijaide, muhto ii loga vuos mearridan gáibida go beatnaga jávkaduvvot jus dan gávdnet.
Priváhtagovva

– Stuorra beana

Boazoeaiggát lea váidán ášši politiijaide ja sii leat dutkamin ášši.
– Bohccuin leat stuorra hávit, nu ahte ferte leamaš oalle stuorra beana mii lea fitnan gárddi siste, muitala politiijabálvá Johannes Jamtveit Guovdageainnu leansmánnekantuvrras.

 

Sáhttá jávkaduvvot

Jamtveit lohká guokte eará bohcco maid gaikkoduvvon, muhto eaiggát ii leat daid goddán go dat soitet buorránit.

– Luovosbeatnagat leat stuorra váttisvuohtan dáppe. Mii šaddat dávjá fitnat báikkiin go luovosbeatnagat earret eará leat gaikkodan bohccuid, muitala Jamtveit.

Politiija sávvá olbmuid cavgilit sidjiide jus oktage diđeš makkár beana dat sáhttá leat gaikkodan dáid bohccuid. Son lohká ahte ii leat vuos sihkar mii dáhpáhuvvá beatnagii jus dan gávdnet:

– Dat lea gitta das maid boazoeaiggát gáibida. Dat sáhttá gáibidit dan jávkadit, čilge Jamtveit.

(Ášši joatká gova vuolábealde)


LUOTTAT BÁHCÁN: Gárdde siste eai lean go beanaluottat ja varraluottat báhcán, maŋŋil go luovosbeana lei geargan oaguheames ja gaikkodeames bohccuid.
Priváhtagovva

 

Boazoeaiggát ii loga iežas vuos mearridan mii galgá dahkkot jus beana gávdno:

– In mun leat ollen nie guhkás vuos smiehttat, dál in dieđe vuos maidege, lohká son.

 

– It don leat hárbman dán dihte?

– Na lea bat hal das ávki?

 

– Dáppe lea veaddingeatnegasvuohta

Politiijabálvás gal livččii čoavddus luovosbeanaváttisvuhtii.

– Dáppe lea veaddingeatnegasvuohta, ja jus olbmot sáhtašedje dan mielde eallit de dat čoavddášii olu. Suohkanis lei maid ovdal šiehtadus muhtin fitnodagain mii lávii váldit luovosbeatnagiid gitta, dat dađibahábut ii leat šat dál, lohká Jamtveit.

-Almmuhus-