Boazodoalli Mikkel Mathis Eira mielas lei heittot go buvttadandoarjja unniduvvui boazodoallošiehtadusas. Sutnje lea dat vahát, go manaha dietnasa. – Dáinna eai bálkkaš sin geat olu vuvdet, lohká son.
Boazodoalli Mikkel Mathis Eira mielas lei heittot go buvttadandoarjja unniduvvui boazodoallošiehtadusas. Sutnje lea dat vahát, go manaha dietnasa. – Dáinna eai bálkkaš sin geat olu vuvdet, lohká son.
Dál lea jagi 2017/2018 boazodoallošiehtadus almmuhuvvon.
Buot njuolggodoarjagat boazodolliide bissot nu go leat leamaš, earret buvttadandoarjja, mii unniduvvui golmmain proseanttain.
Badjeolbmo dienas unnu
Ábborášša boazodoalli Mikkel Mathis Eira mielas lea heittot go unniduvvui.
Son lohká dat lea njuolgut vahát sutnje, go dienas unnu.
– Dát lea heittot sidjiide geat olu vuvdet, sin buvttadeami unnidit. Dát šiehtadus ii boađe eaŋkilolbmui ávkin, boahtá ávkin sidjiide geat eai vuovdde, lohká son.
Dan son čilge ahte go šiehtadusas leat vuoruhan ruđa earret eará dearvvašvuođa, biras ja sihkkarvuođa guorahallamii, de unniduvvo doarjja mii njuolga manná badjeolbmui.
Loga makkár šiehtadus šattai: – Garra šiehtadallamat
– Stuorra vahát
Dálá šiehtadusa mielde oažžu badjeolmmoš 37 proseantta doarjaga buot divatgeatnegahtton dietnasis maid boazodoalus háhká.
Dat lea unniduvvon njeljiin proseanttain, ja lea 34 proseantta.
– Dáinna eai bálkkaš sin geat olu vuvdet, ja munnje šaddá stuora vahát. Doarjagat unnot, ja nu maid dienas unnu. Dan ferten dasto háhkat eará ládje, lohká Mikkel Mathis Eira. Son muitala ahte láve álo vuovdit 600 000 ruvnno ovddas, ja das 37 proseantta lea 222 000 ruvnno. Dál son ii oaččo go 204 000 ruvnno, ja de manaha son 18 000 ruvnno šiehtadusa bokte.
– Go vel ožžo lasáhusa boazodoallošiehtadussii, de lei galgat eaŋkilolbmui maid eambbo dienas. Erenoamážit nuorra olbmuid lei galgat bálkkašit, vai sis šaddá nanu doaibma, lohká son.
Loga maid: – Dál šaddá goikeláibbi borragoahtit
Garra vuoruheamit
Norgga Boazosápmelaččaid Riikkasearvvi (NBR) jođiheaddji Ellinor Marita Jåma lohká sis lei sávaldat bisuhit buvttadandoarjaga nu go lei, muhto garra vuoruhemiid dihte eai nagodan dan.
– Jus mii livččiimet garrasit doalahan dan, de livččii dat váikkuhan eará osiide šiehtadusas, ja dat lea vuoruheapmi maid fertiimet dahkat, lohká Jåma.
– Mii leimmet sávvan ahte galggai bissut nu go lei, muhto mii leat báikkálaš servviiguin ovttas gávnnahan makkár doaimmaid vuoruhit, lohká son.
Jåma lea Ávvirii muitalan ahte ledje nu garra šiehtadusat, ahte measta boatkanedje.
– Jus livčče šaddan botket, de livččii miessedoarjja maid unnut eambbo go dagai, lohká NBR jođiheaddji.
(Ášši joatká gova vuolábealde)
Obbalaččat lassána, muhto proseantta boazodoallái unnu
Son muitala ahte sii ožžo čađa dan maid báikkálaš searvvit ledje sávvan, ja obbalaččat ii leat heajut šiehtadus go ovdal.
– Dieđusge lea unnideamis váikkuhus, muhto lea sáhka golmma proseanttas. Proseantta lea unnon, muhto obbalaš lohku lea lassánan, lohká Jåma.
Diimmá šiehtadusa mielde lei 29,5 miljovnna dat obbalaš supmi mii lei várrejuvvon buvttadandoarjagii.
Ođđa šiehtadusas lea obbalaš supmi 33,5 miljovnna, mii lea njeallje miljovnna eambbo.
