Rievssatbivddu beaiveearit leat stuoriduvvon diimmáža rájes. Seammás galgá áigodatearri vuovdelottiide.
Rievssatbivddu beaiveearit leat stuoriduvvon diimmáža rájes. Seammás galgá áigodatearri vuovdelottiide.
Varas rievssatlohkamat leat čájehan olu eambbo rievssahiid go diibmá go šadde muddet beaiveeari guovtti loddái.
Juohke bivdi beaiveearri lea dál njeallje rievssaha olles Finnmárkkuopmodagas.
Dán jagi bivdoeriin ii leat erohus rievssahis ja gironis.
Seastit eaŋkillottiid
Dán jagi lei Finnmárkoopmodat (FeFo) ovdal lohkamiid juo bidjan vuovdemassii vissis meari koarttaid sidjiide geat eai leat finnmárkulaččat.
Nu lohket dovdat bivddu juohke bivdoguovllus buorebut, ja dan geažil sáhttet fas leat loažžádeappot beaiveeriiguin.
– Bivdit vásihit ahte leat muhtun stuorra beassádagat ja muhtun eaŋkillottit ja bárat. Sáhttet leat báikkálaš erohusat loddehivvodagas. Danne ávžžuhit mii, nu go ovdal, bivdiid leat veahkkin aktiivvalaš fuođđohálddašeapmái. Seastte rávislottiid, divtte eaŋkillottiid girdit viidáseappot ja báže baicca stuorát beassádagaid, lohká FeFo meahccehálddašanjođiheaddji Einar J. Asbjørnsen preassačállosis.
Iešguđetlágán dieđut ovdal lohkamiid
Dieđut mat bohte FeFoi ovdal rievssatlohkamiid ledje iešguđetlágánat.
Muhtumat eai lean obbanassiige oaidnán lottiid, ja earát fas leat dieđihan oalle stuorra beassádagaid.
Muhto rievssatlohkkit čuvvo daid seamma lohkanlinnjáid go vássan jagiid ja dieđihedje ahte leat oaidnán eanet lottiid go diibmá.
Borgemánus leat lohkan rievssahiid sullii 400 km dihto gaskkain 13 suohkanis Finnmárkkus.
Luonddudutkaninstituhtta (NINA) lea daid loguid vuođul rehkenastán ja buktán rávvagiid movt muddet bivddu.
FeFo lea de ovttas Norgga Bivdi- ja Guolásteaddjeservviin Finnmárkkus, Sámi Bivdo- ja Meahcástanservviin ja Oarje-Finnmárkku loddebeanaovttastusain mearridan eriid.
Ráđđádallet fas
NINA geavaha sierra modealla rehkenastit rievssathivvodaga, ja lea seamma modealla mii geavahuvvo muđui riikkas ja dat sulástahttá maid modeallaid maid geavahit Ruoŧas ja Suomas.
– Seammás gozihit mii bivddu, ja golggotmánus lea mis čuovvolančoahkkin dainna golmmain servviin, lohká meahccehálddašeaddji Christina Bjørkli Fefos.
FeFo lasiha diehtun ahte sii juhket nuvttá bivdokoartta buot vuosttašgeardde bivdiide geat ásset Finnmárkkus, nu go diibmá juo dahke.
