58-jahkásaš ukrainalaš šaddá giddagassii go vuorjjai jiekŋaguovžžaid Svalbárddas.
Davvi-Romssa diggegoddi lea dubmen ukrainalačča 30 beaivái giddagassii go lea vuorjan jiekŋaguovžžaid ja go lea vuodján vuodjingoartta haga.
Cuoŋománu álggus vujii Ukraina dievdoolmmoš mearrajieŋa mielde Billefjorden nammasaš vuonas gaskal Adolfgohpi ja Pyramidena Svalbárddas. Son vujii biillain guokte jiekŋaguovžža meattá mat ledje sullii 50 mehtera sus eret, ja jiekŋaguovžžat báhtaredje sus.
Čohkken duomuid
– Ii oaččo giddagasduomu dušše dan dihte go vuorjá jiekŋaguovžžaid, lohká Svalbárdda veahkkesysselmánni Berit Sagfossen NTB:i.
58-jahkásaš lea maid dubmehallan go lea máŋgga geardde vuodján bussiin vuodjingoartta haga. Son lea maid vuodján biillain mearrajieŋa mielde, juoga man ii leat lohpi Svalbárdda biraslága vuođul.
– Dievdu lea ovdal massán rievtti vuodjit mohtorfievrruiguin. Dán háve lei sus geahččalanáigi go oaččui evttolaš duomu guovvamánus dán jagi. Go buot daid rihkkumiid bidjá čoahkkái, de oaččui son giddagasráŋggáštusa, lohká Berit Sagfossen, gii lei áktor áššis.
(©NTB)
