Sámi ofelaččat servet stuorra dáiddačájáhussii Venezias Italias cuoŋománus. Doppe galget leat láidesteaddjin sámi dáiddačájáhusas.
La Biennale Di Venezia lágiduvvo Italias dán mánu. Ofelaččat galget doaibmat veahkkin ja láidesteaddjin go Sámi dáiddárat Pauliina Feodoroff, Máret Ánne Sara ja Anders Sunna ovddastit Sámi ja čájehit iežaset dáidaga Sámi paviljongas.
Lea historjjálaš dáhpáhus. Lea vuosttaš geardde sámi dáiddárat oassálastet nationála paviljongas dáiddabiennálas, ja lea vuosttaš háve go Sápmi lea dohkkehuvvon sierra našuvdnan dán nationála čájáhus arenas.
Illudit
Ofelaččat Nathaniel Holan Larsen ja Ane Malene Nordeng illudeaba sakka.
– Venezia Biennale lea hui gelddolaš. Eai mii oainne sámi dáidaga beaivválaččat máilmmi lávddis. Mun sávan ja jáhkán dáidda Biennales bidjá sámi rivttiid internationála agendai, dadjá ofelaš Nathaniel Holan Larsen.
– Lea somá oassálastit ná erenoamáš dáhpáhussii nu go Sámi paviljonga Venezias. Mun illudan oaidnit mo eará oasit máilmmis vuostáiváldet sámi kultuvrra, dadjá ofelaš Ane Malene Nordeng Sámi Allaskuvlla preassadieđus.
Galget muitalit sámiid birra
Sámi ofelaččat galget leat láidesteaddjin La Biennale di Venezias Itálias gaskal cuoŋománu 20. ja 30. beivviid. Ofelaččat galget oahppat sámi dáidaga birra ja mo sámi dáidda gaskkustuvvo máilbmái. Dasa lassin galget maid muitalit gehččiide sámi kultuvrras, historjjás ja servvodagas,
Norgga Dronnet Sonja rahpá Sámi paviljonga cuoŋománu 21. beaivvi.
Sámi ofelaččat ja Sámi allaskuvla ovttasbarget Office of Contemporary Art Norway (OCA), ja ofelašdoaibma lea koordineren OCAi veahkkin gávdnat eará sámi láidesteaddjiid oasi dan áigodahkii go Sámi paviljonga lea Venezias.
