-Almmuhus-
OĐĐASATŠaddá eahkediid bargat eambbo go dárogielagat seamma ámmáhiin: – Dán eat šat...

Šaddá eahkediid bargat eambbo go dárogielagat seamma ámmáhiin: – Dán eat šat dohkket

-

-

Sámi oahpahusfierpmádat háliida fuomášuhttit sámegieloahpahusa dili Stuoradikki olggobealde.

NetSam jođiheaddji Inger Anne Gaup muitala šaddat maŋŋel bargoáiggi ráhkadit sámegiel oahpponeavvuid. 

Dat lea bargu man eará oahpaheaddjit Norggas eai dárbbat.

– Oahpponeavvu lea dakkár mii lea ráhkaduvvon maŋemuš oahppoplána vuođul. Ii leat dohkálaš go mii dieid girjjiiguin galgat bargat. Dalle šaddat ieža ráhkadit, ja mis han lea seamma bargoáigi ja oahpahusmearri go eará Norgga oahpaheddjiin. Eksámen lea juste seamma, ja gáibiduvvo ahte mii leat oahpahan oahppoplána vuođul, eai ge jeara makkár oahpponeavvut leat, lohká Inger Anne Gaup.

 

Lágidit appealla

Sámi oahpahusfierpmádat NetSam lágida disdaga apealla Stuoradikki olggobealde.

Sii áigot fuomášuhttit sámegieloahpaheddjiid ja -oahpahusa hástalusaid.

– Mii galggašeimmet boahtit eanet oidnosii ja boktit politihkkariid, váhnemiid ja servodaga beroštumi. Lea dego klisjean šaddan ahte sámegielas lea heajos dilli, muhto mii geahččalit dál eambbo muitalit juste movt dat lea, ja mainna mii rahčat, lohká Inger Anne Gaup, NetSam jođiheaddji.

 

Dološ girjjiin dološ ovdamearkkat

NetSam lea dáid beivviid čohkken sámi oahpaheddjiid fágabeivviide Osloi, ja dan oktavuođas áigot doallat apealla. Sii háliidit vástádusa dasa movt sámegiela ja sámi árbevirolaš máhtu galgá nannet oahpahusas.

Sii celket preassadieđáhusas ahte eai sáhte šat bargat dakkár dilis mii ii vuhtii váldde sámi ohppiid rivttiid oažžut oahpahusa iežaset gillii.

Inger Anne Gaup lea sámegieloahpaheaddji joatkkaskuvladásis.

Oahppogirjjit maid son ferte geavahit oahpahusas leat ráhkaduvvon 90-logus, ja ovdamearkkat girjjis leat maid seamma áigodagas.

– Kapihttalis media birra leat ovdamearkan Min Áigi ja Sámi Áigi. Eai ge eará girjjit leat buorebut. Ii dat leat oahppogirji ge, muhto teakstačoakkáldat man geavahit go das leat bargobihtát. Dat lea man eat šat dohkket, juoga ferte dahkkot jođánit, lohká Gaup.

 

– Nuorat garvet sámegieloahpaheaddji oahpu

Son jáhkká unnán oahpponeavvut lea čielga ággan manne sámi nuorat eai loga sámegieloahpaheaddji oahpu.

– Mun oainnán mu oahppit moitet. Jáhkán dat váikkuha manne sámi nuorat eai gille álgit sámi oahpaheaddjeohppui. Gii bat iežas gille diekkár dillái coggat, mas erenoamáš heajos bargoeavttut leat, mađi bajit dássái boahtá, lohká Gaup.

 

Bovden viidát

NetSam miellahtut leat oahpaheaddjit sihke davvi-, julev- ja lullisámegielas, ja buohkat muitalit vásihit seamma hástalusaid sámegiella vuosttašgiellan oahpahusas.

Sii leat bovden stuoradiggepolitihkkáriid searvat, muhto eai leat ožžon dieđu eambbo ovtta politihkkaris ahte boahtá.

Sosialisttalaš Gurutbellodaga Kirsti Bergstø lea politihkar gii áigu searvat NetSam appellii.

NetSam leat maid viidát bovden oaivegávpoga sámi servodaga, vai boađáše bures oidnosii. Gullot aŋkke galget, go sis lea soames artisttat maid fárus geat galget lávlut ja juoigat.

 

-Almmuhus-