Boazodoallošiehtadusas lea šihttojuvvon 2,5 miljovnna ruvnno bidjat «Ut på vidda» ásaheapmái, mii galgá leat bissovaš oahpahus- ja fuollabálvalus boazodoalus.
Doaimmat boazodoalus buktet buriid vásáhusaid, hálddašeami, ovdánahttima ja loaktima.
Dat veahkeha olbmuid geain leat iešguđet hástalusat, čállá Eanandoallo- ja biebmodepartemeanta preassadieđáhusas.
– Hálddašeapmi ja ovdánahttin lea dehálaš buohkaide. «Ut på vidda» lea fálaldat sidjiide geain leat iešguđetlágan hástalusat, ja lea stuora resursan suohkaniidda. Lassin lea bálvalus buorre lassiealáhus boazodollui, lohká eanandoallo- ja biebmoministtar Olaug Bollestad.
«Ut på vidda» lea fálaldat mánáide, nuoraide ja rávesolbmuide geain leat earenoamáš dárbbut ja dárbbašit oadjebas arena. Olbmot geat geavahit «Ut på vidda» fálaldaga, leat mielde dehálaš, praktihkalaš bargguin, fysalaš doaimmain, buriid vásáhusaiguin luonddus, ovttas elliiguin, boradit ja šaddet oassin searvevuođas.
Beroštupmi
Romssa ja Finnmárkku fylkkamánni lohká stuora beroštumi fálaldahkii.
Máŋggas háliidit fállat oahppo- ja fuollabálvalusa boazodoalus.
«Ut på vidda» fálaldat gokčá Romssa, Finnmárkku, Nordlándda ja Trøndelága. Leat bálvalusat maid sáhttet oastit suohkaniin.
«Ut på vidda» lea čađahuvvon geahččalanortnegin, ja lea Romssa ja Finnmárkku fylkkamánni gii lea jođihan prošeavtta. Prošeakta lea ruhtaduvvon boazodoallošiehtadusa bokte.
«Ut på vidda» lea vuohki boazodoalus, seamma sullasaš go «Inn på tunet» lea eanandoalus.
Dál leat badjelaš 400 «Inn på tunet» náveha mat fállet heivehuvvon doaimmaid dáluin.
