Son njuorrasii vel gulai ahte sin orohahkii eai beasa goitge cegget bieggamilluid. Seammás lea dáid beivviid ilbman filbma, mii butká Gearretnjárgga nuoraide vel eambbo ilu.
Elle Karen Anne Sara lei okta dain Gearretnjárgga nuorain geat juovlamánus ledje Sámedikkis čilgeme energiijaministarii Tord Lienii ahte bieggamillopárka, mas galget 60 bieggamillu cegget Fálesráššii, áitá olles sin boahtteáiggi boazodoallin. Dán vahkus bođii diehtu Oljo- ja energiijadepartemeanttas ahte leat hilgon Aurora Kraft ohcamuša.
Dat lea stuora geahpádussan boazodolliide.
– In báljo máhte čilget sániiguin, gal mun nu njuorrasin. Lea nu illu ja hávski go bođii nu buorre diehtu go diet plánat leat guhká váivvidan min ja čađat leamaš jurdagis. Lei oba geahpádus go oaččuimet ipmárdusa departemeanttas man mávssolaččat diet eatnamat leat midjiide. Livččii dahkan nu stuora vahága ahte ii in jáhke doppe livččii šat birgen obage, go ledje áigon dan cegget guovdu orohaga, dadjá son.
Somá johttát
Elle Karen Anne lohká áibbas eará dovdduin ealuin johttát fas Fálesrášša ja Gearretnjárgga guvlui dál giđđat.
– Dál ii dárbbaš šat jurddašit dien váivvi, ja johtit šaddá maid nu somá vuolgit. Orru goit boahtteáigi ain, jus dál ii boađe fas eará mii áitá, dadjá Sara.
Eanandárbbuid birra
Seammás go dát diehtu lea boahtán, lea maid filbma leavvagoahtán neahtas mas oaidnit su ja sin bearraša giđđajohtimis. Dan filmma lea Statnett almmuhan diehtojuohkinfilbma boazodoalu dárbbuid birra ja lea boazodoalu eanandárbbuid ja sisabáhkkemiid birra.
Geahča Statnett diehtofilmma dás vuollelis!
Soaittáhagas Gearretnjárga
Filbma lea gal almmuhuvvon dušše soaittáhagas sulllii seammá áiggis go departemeanta hilggui Fálesráššii bieggamilluid. Statnett diehtojuohkinhoavda Berit Erdal ii loga dán filmmas makkárge oktavuođaid bieggamillo ohcamušain. Sis ii leat makkárge rolla bieggamilloplánain. Sin bargu lea čilget buvttadandárbbuid, ja láhčit elrávdnjefievrredeami dan mielde.
– Kautokeino Film lea válljen čuovvut muhtin orohaga dálveorohagas geasseorohahkii vai čájehivčče makkár hástalusat leat jođidettiin. Eat leat mii válljen juste Gearretnjárgga fokuseret, dadjá son.
Filmmain lohká áigut juohkit eambbo dieđuid stuora fitnodagaide ja beroštumiide mat áiggoše hukset boazodoalloguovlluide.
– Min entreprenørat leat dávjá Norgga dahje riikkaidgaskasaš stuora fitnodagat main eai oba dovddage boazodoalu. Mii leat ráhkadan filmma vai sii ipmirdivččče manne barggut fertejit muhtin áigodagaid bissehuvvot boazodoalu dihte, ja mii oahpahit iežamet bargiid maid dáinna. Leat hui duhtavaččat bohtosiin, dadjá Erdal.
Elle Karen Anne lea maid duhtavaš filmmain.
– Mu mielas lea goit diehtojuohkinfilbma positiiva ja soaitá maŋit áigái maid ávkin, go das han čilge ja čájeha hui bures bohcco dárbbu eatnamiidda, dadjá nuorra boazodoalli.
