Sámeálbmot Bellodaga sátnejođiheaddjeevttohasa mielas lea unnán dáhpáhuvvan Gazzanjárgga hámmanis maŋemuš njealji jagis.
Sámeálbmot Bellodaga sátnejođiheaddjeevttohasa mielas lea unnán dáhpáhuvvan Gazzanjárgga hámmanis maŋemuš njealji jagis.
Unjárgga gielddas lea guolásteapmi dehálaš vuođđoealáhus ja Gazzanjárgga hámman lea ođasmahtton ja stuoriduvvon dán válggaáigodagas, muhto Unjárgga Sámeálbmot Bellodaga (SáB) sátnejođiheaddjeevttohas Bjarne Store-Jakobsen oaivvilda ain ollu barggu báhcán.
– Hámmanis lea ain báhcán ollu bargu, nu go guollevuostáiváldin, mii ferte ođasmahttot ja stuoriduvvot. Leamašan guhkit áiggi ášši dát gielddas, nu ii leat ášši ođas, muhto ii mihkkige leat dáhpáhuvvan maŋemuš jagiid. Dál, go válggat leat, de orru Bargibellodat berošteamen áššis, lohká Store-Jakobsen.
Son lohpida iežas jienasteddjiide ahte bargu galgá álggahuvvot lagamus njealji jagis.
Vuorkágovva
Dušše lohpádusat
Su mielas lea ártet go ii mihkkige leat dáhpáhuvvan, ja lohká SáB lea hoahpuhan ášši, muhto eanetlohku ii leat beroštan bargat maidige.
– Sátnejođiheaddji lohpida dušše, muhto ii mihkkige dáhpáhuva. Mun lohpidan iežan jienasteddjiide ahte bargu álggahuvvo, lohká Bjarne Store-Jakobsen.
Háhkat ruhtadeami ja lobi
Bjarne Store-Jakobsen oaivvilda Gazzanjárgga hámmana viidásat bargu ferte álggahuvvot nu jođánit go vejolaš, jus guolásteapmi galgá ovdánahttot gielddas.
– Guollevuostáiváldin ferte boahtit sadjái, vai guolásteaddjit sáhttet buktit guliid. Ášši lea dan mađe boaris ahte dál lea dušše sáhka háhkat ruhtadeami ja oažžut lobi eiseválddiin. Guolásteapmi lea okta gieldda deháleamos geađgejulggiin ássamii, dadjá SáB sátnejođiheaddjeevttohas.
(Ášši joatká gova vuolábealde)
– Ii čuvvon mielde
Bargiidbellodaga sátnejođiheaddjeevttohas ja dálá sátnejođiheaddji Knut Inge Store ii loga Store-Jakobsena čuvvon mielde doarvái bures.
– Mii leat ođasmahttán ja stuoridan hámmana, dalle ii leat son čuvvon mielde mii dáhpáhuvvá gielddas, lohká sátnejođiheaddji ja lasiha ahte hámmanis lea ođđa krána ja ođasmahtton elrávdnjerusttet.
– Mii leat vuoruhan guolásteami ja áigut ain vuoruhit, lohká son.
Lohpida ođđa guollevuostáiváldinrusttega
Knut Inge Store muitala iežas gulahallan guolástanservviin ja dál lea dárbu ođđa guollevuostáváldinrusttegii.
– Mii leat čuovvolan ja vuoruhan daid dárbbuid maid guolásteaddjit leat ovddidan. Min lohpádus lea ahte guollevuostáiváldin galgá leat sajis 2016:s jus ruhtadeapmi lea sajis, lohká Knut Inge Store.
Dehálaš gildii
Unjárgga sátnejođiheaddji deattuha ahte guolásteapmi lea dehálaš ealáhus gildii, ja lohká ollu nuorat vuoruhit guolásteami.
– Mii geahččalat láhčit dili buohkaide, go guolásteapmi buktá ollu bargosajiid gildii, lohká Store.
Sosialisttalaš Gurutbellodaga sátnejođiheaddjeevttohas Oddvar Betten lohká Unjárggas lea politihkalaš ovttaoaivilvuohta ahte guollevuostáiváldinrusttet ferte ođasmahttit ja stuoriduvvot.
– Hámman lea jo stuoriduvvon, muhto in dieđe leat go das nu ollu eambbo vejolašvuođat. Lea goit dehálaš vuoruhit ealáhusa mii manná bures gielddas, lohká son.
