Iđut-lágádus almmuha dál Š-bláđi ođđa nummara. Dát lea vuosttaš Š-bláđđi man ođđa doaimmaheaddji Iŋgá Káre Márjá Utsi lea doaimmahan. Mielddusin čuovvu Š-115 ovdasiidu. Boahtte Š almmuhuvvo juovlamánus.
Iđut-lágadus doaimmaheaddji Nan Persen dieđiha preassadieđáhusas ahte dán nummaris muitalit Egil Stueng (20 jagi), dahje Eggster, gii ráhkada musihka šáŋŋeris mii ii gullo dávjá Sámis. Dál muitala Eggster maid son váillaha sámi musihkkamáilmmis.
Elin Oskal (25 jagi) Luonosvákkis Sáltoduoddaris lea bajásšaddan boazodoalus. Dál son lea artista ja neavttár ja muitala mo lea lávket teáhterlávdái vuohččan.
Sara-Elvira Kuhmunen (21 jagi) Johkamohkis válljejuvvui miessemánus Sáminuorra-organisašuvnna ságadoallin. Sáminuorra vuođđuduvvui 1963:s ja lagabui 300 nuora leat mielde.
Dávvet Bruun-Solbakk ja Isalill Kolpus leaba ráhkadan podcasta «Sameting». Dát lea Sámi vuosttaš humorpodcasta dárogillii. «Sametinget, valgkamp og erotika i ventilasjonssystemet» lea vuosttaš oasi namma ja lea gávdnamis Spotifys.
JEARA DIVŠŠÁRIS lea nuoraidmagasiinna ođđa spálta! Jus nuorain leat gažaldagat mat gusket iežaset dearvvašvuhtii ja seksualitehtii, de besset sii jearrat divššáris. Áibbas anonyman. Ánne-Hedvig vástida daid. Kárášjohkalaš Ánne-Hedvig Salmi Nordsletta (30) lea jorttamora ja buohccedivššár, ja dál son lea miehtan veahkehit sámi nuoraid gávdnat vástádusa buotlágan dearvvašvuođagažaldagaide.
Š almmuhuvvo 4 geardde jahkái. Š-bláđđi lea sáddejuvvon 1271 nurrii sin skuvlla bokte, oktiibuot 70 skuvlla. Š sáddejuvvo nuvttá skuvlanuoraide Norggas geain lea sámegiella fágan oahpahusas.
