-Almmuhus-
OĐĐASATŠ-bláđđi lávke nehttii

Š-bláđđi lávke nehttii

-

-

Iđut almmuhišgoahtá Š-nuoraidmagasiinna prentenhámis njealje geardde ja Š-bláđđi oažžu sierra ruovttusiiddu. 

Iđut lágádus Ikkaldasas Porsáŋggu gielddas lea máŋga jagi almmuhan Š-nuoraidbláđi mas teavsttat leat čállon sihke davvisámegillii, julevsámegillii ja máttasámegillii. 

– Dál sáhtát oastit ja lohkat Š-bláđi maiddái digitálalaččat, neahttabuvdda BuyAndRead bokte! Guovvamánu 2021 rájes lea Š neahttamagasiidna maiddái, muitala Iđut beaivválaš jođiheaddji Åge Persen.

Son čilge ahte dássážii lea Š-nuoraidmagasiidna leamaš gávdnamis pdf-hámis interneahtas. Iđut lea almmuhan Š-bláđi guđa geardde jahkái. 

Ođđasamos Š-nuoraidbláđđi 112-2020. šearbmagovva: Iđut
Ođđasamos Š-nuoraidbláđđi 112-2020. šearbmagovva: Iđut

– Boahtte jagi rájes prentet Š-nuoraidmagasiinna njealje geardde jahkái. Dalle leat luvven ruđaid Š-bláđi neahttasiidui gosa almmuhat áššiid , videoid ja nu ain, čilge beaivválaš jođiheaddji Åge Persen.

Lohká sisdoalu ektui buktá dát neahttasiidu ođđa vejolašvuođaid nu go sáhttet almmuhit eanet govaid ja videoid. Giela dáfus besset nuorat gullat davvisámegiela, julev- ja máttasámegiela ja dárogiela. 

– Teksten videoide sáhttá šaddat gáibideaddji bealli. Muhto neahttasiidu addá vejolašvuođa vuoruhit julev- ja máttasámegiela. Lea min doaimmaheaddji Niels Ovllá Oskal Dunfjell gii lea bargagoahtán dainna neahttafálaldagain, lohká Iđut lágádusa beaivválaš jođiheaddji Åge Persen. 

Iđut lágádus almmuha lassin Š-nuoraidbláđđái, maid mánáidgirjjiid ja čáppagirjjálašvuođagirjjiid. Ovdal leat sii maid almmuhan oahpponeavvuid, fágagirjjiid, musihka ja filmmaid. Eanaš almmuheamit leamaš davvisámegillii, muhto sii leat maid almmuhan julev- ja máttasámegillii, dárogillii ja kvenagillii. Redaktevra lea Nan Persen. 

-Almmuhus-