Stuora oassi báhtteriin gevvet ruskalihttái maŋŋil go leat guorranan, mii bilida birrasa. Coop Norga ja Energizer geahččalit dál máilmmi vuosttaš báhtterpántenmašiinna, vai eambbosat álggáše máhcahit báhtteriid.
Stuora oassi báhtteriin gevvet ruskalihttái maŋŋil go leat guorranan, mii bilida birrasa. Coop Norga ja Energizer geahččalit dál máilmmi vuosttaš báhtterpántenmašiinna, vai eambbosat álggáše máhcahit báhtteriid.
Pántenmašiidna, mii biddjo muhtun Obs rámbuvrraide, lea vuosttaš máilmmis. Mašiidna lea buvttaduvvon Ruoŧas, ja olbmot sáhttet pántet buotlágan ruovttudoallobáhtteriid. Seamma ládje go bohtalpántenmašiinnas.
Ovtta báhttera ovddas oažžu ovtta ruvnno. Ruđain sáhttá oastit ođđa báhtteriid. Dan dieđiha Coop preassadieđáhusas.
26 proseantta bálkestit ruskalihttái
Juohke jagi geavahit 2000 tonna báhtteriid Norggas, stuora oassi dain gevvet ruskalihttái. Iskkadeapmi, man YouGov lea čađahan Coop Norgga ja Energizer ovddas, čájeha ahte 26 proseantta álbmogis bálkestit báhtteriid ruskalihttái.
80 proseantta eai dieđe ahte báhtteriin sáhttet birasmirkkut. Measta liikká oallugat oaivvildit ahte lea dehálaš máhcahit báhtteriid.
– Gelddolaš
Pántenmašiidna johtá muhtun Obs-rámbuvrrain lulde.
– Coop eaiggáduššet kundarat, ja mii háliidit álkidit birasgáhttema iežamet mieleaiggádiidda. Eatnasat máhcahit báhtteriid biebmorámbuvrraide gos leat sierra stašuvnnat, muhto norgalaččat fertejit šaddat vel čeahpibun. Olbmot dihtet ahte leat birasmirkkot báhtteriin, muhto muhtumat soitet dárbbašit liigeákka vai máhcahit báhtteriid. Danne lea gelddolaš geahččalit pántenortnega, lohká Coop birashoavda, Knut Lutnes.
Rápmásat
Sis lea maid buorre ágga jáhkkit ahte pántenortnet ávkkuha. Iskkadeamis vástidii bealli ahte pántenortnet livččii váikkuhan maid barget báhtteriiguin. 71 proseantta sis geat bálkestit báhtteriid ruskalihttái vástidedje ahte pántenortnet livččii ožžon sin máhcahit báhtteriid.
– Mii leat hui rápmásat ovttasbargguin Coop Norggain. Dát bargu fuomášuhttá báhttermáhcaheami. Mii leat máilmmi stuorámus báhtterbuvttadeaddjit, ja beroštit olles báhttera «eallimis», buvttadeamis dassá go bálkestuvvo, lohká Energizer márkanhoavda Richard Podevin,
