-Almmuhus-
OĐĐASATRuvkefitnodat Beowulf viiddida iežas doaimma Supmii

Ruvkefitnodat Beowulf viiddida iežas doaimma Supmii

-

-

Ruvkefitnodat Beowulf mii háliidivččii álggahit ruvkedoaimma Gállokis Ruoŧa bealde Sámi, oastá dál Oy Fennoscandian Resources AB -nammasaš fitnodaga.

Yle Sápmi čállá odne  ahte ruvkefitnodat Beowulf oastá Oy Fennoscandian Resources AB -nammasaš fitnodaga, man bargun lea dutkat, gávdno go Davvi-Suoma Kolaris ja golmma nuortasuopmelaš báikegottis grafihttaminerála.

Beowulf áigu lassin ráđđádallat ovttasbarggus suoma Oy Fennoscandian Investment Group -fitnodagain, mii ohcá nihkkela ja metállaid Davviriikkain.

Vahku áigge ges beakkehii ahte Ruoŧa ráđđehus mearrida áramustá guovvamánus oažžu go Eŋglándda Beowulf fitnodat doaibmalobi ruovdemálbmaruvkái Gállokis Johkamohki oarjjabealde.

Beowulf fitnodaga doaibmajođiheaddji Kurt Budge mielde, fitnodagas ii leat váttisvuohta gávdnat investerejeddjiid Gállokii, vaikko máŋgasat vurdet Ruoŧa ráđđehusa mearrádusa ruvkedoaibmalobiid ektui ovdal go bidjet dasa lasi ruđa. Budge jáhkká ahte Ruoŧa ráđđehus miehtá ruvkefidnui.

– Mu mielas mis lea ágga jáhkkit ahte mii leat vuđolaččat dokumenteren dán leat vejolažžan, ja maŋimuš jahkebealis leanaráđđehus ja ruvkedárkkistanvirgedoaimmahat Bergsstaten leat miehtan ruvkedoaibmalohpái. Nu mun jáhkán dáinna geainnuin mii ovdánit, lohká Budge.

 

-Almmuhus-