Preassadieđáhusas iežaset neahttasiđđus čállá ruvkefitnodat ahte sii leat ožžon ođđa ohcanlobi Gálloga guovllus Párkijávrris.
Beowulf mining čállá ahte sii ožžot dál iskat 1000 hektára sturrosaš guovllus Párkijávri lahkosis. Dat ođđa ohcanlobi addá vejolašvuođa fitnodahkii ohcagoahtit vel eambbo magnetit-ruovdemálmma guovllus. Iskosat čájehit ahte doppe sáhttet eambbo magnetit-minerálat guovllus go álggos leat gávnnahan.
Dán vahku mielde lea maid Beowulf mining ruvkefitnodat čállán šiehtadusa Ruoŧa GeoVista AB:in vai sii sáhttet iskat geofysalaš dieđuid ja maid ohcagoahtit Párkijávrris. Ohcamat álggahuvvojit 2020 čavčča.
Beowulf lea oassi EU ruhtaduvvon prošeavttas PACIFIC-proševttas mii álggahuvvui 2018:s. Sii leat ožžon 3,2 miljovnna euro EU dutkanprográmmas Horizon 2020. Gállok, Gállok North, Kallak South ja Párkkijávri ohcanlohpi lea válljejuvvon guovtti PACIFIC-prošeavtta geahččalanbáikin.
Beowulf ruvkefitnodaga jođiheaddji Kurt Budge dadjá ahte leat vuordime mearrádusa Ruoŧa ráđđehusas besset go álggahit ruvkke Gállogii.
– Dál iskat gávdnojit go vel eanet magnetitmineralat guovllus go álggos leat doivon. Dál lea gávdnon 250 miljovnna tonna málbma Gállogis ja dat ohcanlohpi Parkijaure nr 6, dagaha ahte vel sáhttet ohcat eanet ja stuorit guovllus, dadjá son.
