Fálesnuori sátnejođiheaddji lohká ruvkeálggaheapmi mearkkašivččii ahte suohkan ovdána ekonomalaččat.
Fálesnuori sátnejođiheaddji lohká ruvkeálggaheapmi mearkkašivččii ahte suohkan ovdána ekonomalaččat.
Fálesnuori suohkana sátnejođiheaddji Terje Wikstrøm (Bargiidbellodat) lohká Birasdirektoráhta ruvkeálggahanlohpi Nussirii mearkkaša ahte rukkedoaimmas čuovvu opmodatvearru mii suohkanii boahtá ávkin.
– Dieđusge lea ollu politihkalaš ja hálddahuslaš bargu mii vuordá go galgá álggahuvvot ruvke, ja earret opmodatvearu iežas dan ruvkedoaimmas, de vuordimis čuvvot buorit oalgeváikkuhusat, nu movt eanet bargosajit ja olmmošlohku lassána. Ii leat eahpádusge ahte dat sáhttá ekonomalaččat mearkkašit issoras ollu suohkanii, ja mii oaidnitge movt min ránnjásuohkan, Hámmárfeasta, lea ovdánan Muolkkuid gássaealáhusain, lohká son.
Vuosteháhku
Wikstrøm lea vuohttán vuostehágu, sihke boazodoalus ja guolásteddjiin.
– Mii dohkkehit vuostehágu, muhto vuolggasadji lea váikkuhusguorahallan mii dahkkui miessemánu 8. beaivvi 2012:s ja dasa lea biddjon ollu áigi ja lea leamaš buorre áigi iešguđet berošteddjiide buktit cealkámušaid. Ferten deattuhit ahte váikkuhusguorahallamis lea fágalaš beliin vuhtii váldon movt ruvkebázahusaid merrii luoitin váikkuha guliide. Maiddái lea gáddedeponiija árvvoštallojuvvon, mii livččii eanet goarádussan boazodollui, lohká son.
Demokratiija mearrida
Wikstrøm lohká politihkkarat sáhttet dušše vuhtii váldit fágalaš guorahallamiid, mii lea dat áidna dohkálaš vuohki.
– Mun ipmirdan ahte ii leat ovttaoaivilvuohta birasváikkuhussii. Vaikko lea vuosteháhku, de ferte maid čuovvut daid demokráhtalaš prinsihpaid servvodagas Birasdirektoráhta mearrádusa ektui, lohká son.
Ii beare gurret merrii
Wikstrøm oaivvilda maid dehálažžan čalmmustahttit ahte leat biddjon garra eavttut Nussir ASA ruvkefitnodahkii.
– Dat ii mearkkaš ahte ruvkefitnodat oažžu beare gurgalit bázahusaid merrii. Dasa leat eavttut biddjon nu movt čađat gozihit deponiija, ja bearráigeahččat ahte bázahusat eai leava eará sadjái vutnii, lohká Wikstrøm.
