Dál lea Ruoŧa Alimus Duopmostuollu cealkán Ruvhten sijtei, ahte vuoruhit sin guoddaleami.
Dál lea Ruoŧa Alimus Duopmostuollu cealkán Ruvhten sijtei, ahte vuoruhit sin guoddaleami.
Guovtti jagi dás ovdalis guoddalii Ruvhten sijte Ruoŧas duomu Alimus Duopmostullii go vuoittáhalle Härjedalensáššis, gos njeallje čearu masse dálveguohtunvuoigatvuođaid priváhta eatnamiin, čállá sverigesradio.se.
Dáhtto ášši vuoruhuvvot
Go Alimus Duopmostuollu ii lean vuos álggahan barggu dán guovtti jagis, de lea Ruvhten sijte dáhtton ahte sin ášši vuoruhuvvo Alimus Duopmostuolus Ruoŧas, go sidjiide lea hirbmat dehálaš ahte ášši čovdojuvvo.
Stevdnejedje njeallje čearu
Dál lea Ruoŧa Alimus Duopmostuollu cealkán Ruvhten sijtei ahte sii vuoruhit dán guoddaleami. Härjedalenáššis stevdnejedje Härjedalen olu vuovdefitnodagat ja 700 eanaeaiggáda njeallje čearu, namalassii Mittådalen, Tåssåsen, Ruvhten ja Eira.
Surgadis dili buktán
Ruvhten advokáhtat Camilla Wikland ja Lars Melin lohket sis lea áddejupmi ahte Alimus Duopmostuollu ádjána rahkánit. Soai čilgeba lea Härjedalenduopmu lea buktán čerrui surgadis dili go Ruvhten sijte lea manahan eanaš dálveguohtuma.
– Moai balle maid ahte Alimus Duopmostuolu guhkes áiggi meannudeapmi, rihkku čearu vuoigatvuođa geahčalit ášši duopmostuolus nu mo Eurohpákonvenšuvnna dáhkida. Muittuhetne maid ahte čearu váldovihtan lea boaris ja buoza eallá, ja danin berrešii Alimus duopmostuollu maid vuoruhit ášši.
Mihttomearri leat ahte ášši meannuduvvo skápmamánus. Muhto goas Alimus duopmostuollu cealká duomu, eai sáhte dadjat.