Kárášjoga ja Guovdageainnu russat dinejit 75 ruvnnu juohke nama ovddas maid čogget Sámi Álbmotbellodaga (SáB) ovddas. Bellodat dárbbaša 500 vuolláičállaga ovdal vahkku gollá, muđui eai beasa dieđihit iežaset fylkkadikkeválggaide.
Buot bellodagat mat servet fylkkadikkeválggaide galget gárvet iežaset listtuid ovdal njukčamánu 31. beaivvi diibmu 12:00:s. Sámi Álbmotbellodat lea hoahpuid siste ásahan nammačoagginakšuvnna vai dohkkehuvvošii bellodahkan ja beasašii cegget listtu Finnmárkku Fylkkadikkeválggaide.
Áŋgiruššet russaid
SáB dárbbaša 500 vuolláičállaga ovdal besset searvat válggaide. Vahkku ii leat beare guhkes áigi, ja danin fertii bellodat geavahit hutkáivuođas veahkkin.
– Mii leat váldán oktavuođa Kárášjoga ja Guovdageainnu russaiguin, ja fállan ruđa juohke nama ovddas maid čogget min ovddas. Goappašat báikki russat servet ja ožžot 75 ruvnnu juohke nama ovddas, lohká John Nystad, gii lea SáB njunuš fylkkadikkeválggain.
Sihkostuvve bellodatregisteris
Sámi Álbmotbellodat čađahii vuolláičállima 1999:s, muhto sihkostuvai Norgga bellodatregisteris go eai divvon listtuset Stuorradikkeválggaide guovtti jahkái. Dál dáhttu SáB fas dohkkehuvvot bellodahkan ja politihkket fylkkadásis.
– Politihkalaččat lea bellodagain áigumuš politihkket juohke arenas, sámejietna ferte gullot maiddái fylkkas. Min eallit máŋggabealat servodagas, sámevuohta ja sámejietna galgá leat stuora oassin servodagas. Lea stuora vahágin jus eat gullo, lohká Nystad.
Nominašuvdna gárvvis
Vaikke SáB ii leat vel dohkkehuvvon bellodatregisteris, de lea bellodat gárven jo iežas nominašuvnna.
– Leamaš stuora hástalus oažžut olbmuid mielde go ná oanehis áiggis leat ásaheamis listtu. Oallugat lohket háliidit mielde, muhto eai fal njunnošii. Dattege leat nagodan ráhkadit listtu, lohká Nystad ja joatká muitaleamis iežaset sávaldaga birra.
– Jus álbmos lea dáhtu ahte sámejietna gullo, de lea mus nana osku ahte meinestuvvat čoaggit 500 nama, lohká son.
Russaid servodatfágaoahppu
SáB fuomášii russaid áŋgiruššet go sii leat oallugat ja go oidnet ahte ná sáhttet dinet ruđaid jođánit.
– Lean maid smiehttan ahte go nuoraid áŋgiruššá, de oahpásmuvvet guđe láhkai smávit bellodagat fertejit ražastit vai besset searvat válggaide, dát lea dego sin servodatfága oahppu sidjiide, čilge Nystad. Son sávvá dál ahte olbmot váldet bures vuostá russaid.
– Go russat bohtet skoalkkuhit uvssaid, de doaivvun ahte olbmot bures vuostáiváldet nuoraid go bohtet sin ruovttuide.
Muđui váttis dinet ruđaid
Kárášjoga russapresideanta Áigin Magnus Fjellheim Sarre ii leat jurddašan nu olu dan birra ahte lea politihkalaš bellodat mii áŋgiruššá sin, son oaidná baicce stuora ávkki dietnasis.
– Mu mielas lea dát buorre doaibmabidju russaide, erenomážit go vásihit ahte min gielddas lea váttis dinet ruđaid. Go oaččuimet fálaldaga, de gávnnaheimmet ahte háliidat searvat vai eat dárbbaš buot goluid máksit iežamet ruđaiguin, lohká Sarre.
