Norgga ja Ruoŧa ráđđehusat vuolláičállet dán vahku šiehtadusa man mielde ruoŧŧelaččat geain lea ruoŧa vuodjinkoarta, besset vuodjit skohteriiguin maiddái Norggas.
Norgga ja Ruoŧa ráđđehusat vuolláičállet dán vahku šiehtadusa man mielde ruoŧŧelaččat geain lea ruoŧa vuodjinkoarta, besset vuodjit skohteriiguin maiddái Norggas.
Norgalaččat leat máŋggaid jagiid jo beassan norgga vuodjinkoarttain vuodjit skohteriin Ruoŧas, ruoŧŧelaččat ges čađahit norgga geahččaleami ovdal go leat beassan Norggas vuodjit.
Odne, gaskavahko dattege vuolláičállet dán guokte riikka ráđđehusat šiehtadusa man mielde ruoŧŧelaččat geain lea ruoŧa vuodjinkoarta besset Norggas vuodjit skohteriin, čállá Nationen.
Bargan áššiin
Áviissa dieđuid mielde ledje ođđajagis 82.123 muohtaskohtera Norggas, ja ođđa šiehtadusain sáhttet njealljegeardde eambbo skohterat vuodjit Norgga mehciin.
– Mii leat ovddidan dán ášši jo muhtin áigge. Vuossárgga oaččuimet movttiidahtti e-poastta min gáibmeorganisašuvnnas Ruoŧas, lohká Muohtaskohterimportevrraid Searvvi čálli Arve Lønning.
Johtalusministtar Ketil Solvik-Olsen lea Stockholmas gaskavahkku, dan duođašta Johtalusdepartemeantta áviisii.
Hehttehussan boazodollui
Njuolggadus mii lea gieldán ruoŧŧelaččaid vuodjimis skohteriin Norggas lea leamaš hehttehussan boazodolliide geat siiddastallet Norgga-Ruoŧa rájás.
Norgga sámediggepresideanta Aili Keskitalo moittii maid dán njuolggadusa Nordlysas diibmá.
Son gohčodii dan «molbo-njuolggadussan».
– Mu mielas lea dát heahpat norggabealis, logai son dalle.
Dál goittot jávká dát njuolggadus.
