Golbma olbmo, okta Norrbottenis ja guovttis Jämtlánddas leat vižžon helikopteriin duoddaris go sis ledje korona dávdamearkkat dieđiha SVT Norrbotten.
Muhto ii ovttasge dán golbmasis leat vel dieđihuvvon koronadávda.
Jus leat korona dávdamearkkat duoddaris, ja jus lea orrume Ruoŧa duristtasearvvi barttain de galgá váldit oktavuođa heahtebálvalusain. Nu sii dárkkistit dárbbašuvvo go vižžot helikopteriin dávdamearkkaid dihte.
– Olbmos geas leat dávdamearkkat biddjo erremii duoddaris, dadjá Johanna Murray, Ruoŧa duristtasearvvi jođiheaddji. Nu sii eai njoammut earáid ja de isket jus dárbbaša viežžat daid helikopteriin.
Ruoŧa duristtasearvvi barttain leat maid unnit guossit go dábálaččat go ferte ovdagihtii diŋgot idjasaji ja nu sáhttet dollat gaskkaid vai korona ii njoamo čállá SVT Norrbotten.
