Stockholma leanastivra ja Sámediggi galget gozihit mo Ruoŧŧa deavdá unnitloguid álbmogiid vuoigatvuođaid. Raporta čájeha ahte 2014:s ii leat mannan nu bures.
Stockholma leanastivrras ja Sámedikkis galget gozihit mo Ruoŧŧa čuovvu lága vihtta našunála minoritehtaid vuoigatvuođaid birra. Jahkásaš raporta, mii dál geigejuvvo ráđđehussii, čájeha ahte 2014:s lea ovdánan njozet.
– Go gávdnojit ekonomalaš doarjagat de gal šaddet buorit bohtosat doaimmain, muhto ollislaččat gal orro áigi bisánan, dadjá Sámedikki ossodathoavda Marie Louise Allas preassadieđáhusas maid Stockholma leanastivra lea sádden.
– Ii oaččo coavcci
2010 ođđajagimánu rájes lea leanastivrras ja Sámedikkis leamaš váldoovddasvástádus gozihit mo Ruoŧa minoritehtapolitihkka čađahuvvo. Ođđaseamos raporttas boahtá ovdan ahte našunála minoritehtaid riektesihkkarastin geográfalaš hálddašanguovlluin, lea ovdánan 2010 minoritehtapolitihka nuppástusa rájes.
Maiddái stáhta eiseválddit orrot diehtimin eanet minoritehtapolitihka ja minoritehtaid vuoigatvuođaid birra. Muhto dát ovdána njozet, čájeha raporta. Hálddašanguovllu gielddaid áŋgiruššan ii leat lassánan 2013 raporta rájes, ja muhtin guovlluin lea hedjonan vel.
– Sis, geat orrot dakkár gielddain mat ožžot stáhtadoarjaga vissis minoritehtagielaid várás, leat stuorámus vejolašvuođat oažžut vuoigatvuođaideaset devdot. Muhto minoritehtapolitihkka ii oaččo doarvái coavcci dain gielddain mat eai gula hálddašanguvlui, dadjá Leanastivrra bargomárkan- ja vuoigatvuođa ovttadaga ovdánahttinjođiheaddji Helena Cronséll.
–Lágas váilevašvuođat
Leanastivra ja Sámediggi leat gávdnan váilevašvuođaid dálá lágas maid oaivvildit dagahit ahte minoritehtapolitihkas eai leat dat bohtosat maid ledje sávvat. Vai minoritehtaid vuoigatvuođat duohtandahkkoše jođáneappot, de árvalit rievdadit lága nu ahte šattašii dárkileappot.
– Mii leat dál dakkár dilis gos lea dárbu ahte láhka definere man hejot gielddat ožžot hálddašit ovdaskuvla- ja boarrásiiddikšofálaldagaid minoritehtagielaide, dadjá Marie Louise Allas.
– Rahčet čuovvumis
Raporttas árvaluvvo earret eará ahte Skuvladoaibma oažžu bargun hahkat eanet minoritehtagielat oahpaheddjiid ja ráhkadit eanet oahpponeavvuid našunála minoritehtagielaide.
– Našunála minoritehtaid vuoigatvuođaid láhka lea doaibman vihtta jagi dál, muhto mii oaidnit ain ahte rahčet čuovvumis lága máŋgga sajis riikkas. Ruoŧŧa ferte guhkkelebbui olahit dán áššis, dadjá Helena Cronséll.
