Ruoŧa Sámedikkis lea dievasčoahkkin Lulejus dán vahku. Earret eará jienastedje lea go dievasčoahkkimis ain luohttámuš stivrii.
Ruoŧa Sámedikkis lea dán vahku leamaš dievasčoahkkin. Earret eará leat digaštallan Davviriikkaid sámekonvenšuvnna ja eahpeluohttámuša Ruoŧa Sámedikki stivrajođiheaddjái Håkan Jonssonii maŋŋá go son galgá bealálašvuođain virgádan politihkalaš ráđđeaddi.
Lea Sámedikki hálddahushoavda Fredrik Östling gii lea váidán politiijade Ruoŧa Sámedikki ságadoalli Håkan Jonssona, go son lea virgádan iežas bellodaga áirasa politihkalaš ráđđeaddin, čállá Norrbotten aviisa NSD. Jonsson navdo leat leamaš bealálažžan virgádeami oktavuođas ja danin lea váidon.
Eahpeluohttámuš
Maŋŋá go opposišuvdna moittii stivrra, de loktejuvvo eahpeluohttámuš stivrra vuostá dievaščoahkkimis. Earret eará dajai Samernas bellodaga Anders Kråik dievasčoahkkima sárdnestuolus sin oaivvildit ahte stivrii ii leat luohttámuš go leat ollásit boastut bargan.
Håkan Jonsson dajai sárdnestuolus ahte ferte jienastit.
– Maŋŋá dan dáhpáhusa fertet jienastit lea go stivrii ain luohttámuš.
Ruoŧa Sámedikki áirasat jienastedje lea go sis ain luohttámuš stivrii, ossodatjođiheddjiide ja skuvlahovdii.
17:s lea ain luohttámuš ja 14 áirasis ii leat.
