Ruoŧa Sámediggi galgá lágidit dievasčoahkkima fysalaččat skábmamánu loahpas Árvvesjávrris vaikko korona lassána Norrbottena leanas.
Paulus Kuoljok lea Ruoŧa Sámedikki čoahkkinjođiheaddji ja son dadjá Sámerádioi ja SVT Sápmái ahte lea vejolaš doallat dievasčoahkkima vaikko korona lassána leanas.
– Mis leat garra ráddjehusat čoahkkimis ja mii plánet čađahit dan nugo lea plánejuvvon. Lea stuorit vejolašvuohta ahte dávda njoammu árgabeaivvi go dievasčoahkkimis, cealká son Sámerádioi ja SVT Sápmái. Kuoljok dadjá maid ahte lea váttis čađahit dievasčoahkkima digitála hámis ja danin válljejit deaivvadit fysalaččat.
