Ruoŧa Sáme­diggi juolluda doarjaga sámegiel «Mamma Mu» filbmii 

Ruoŧa Sámedikki kulturlávdegoddi lea čoahkkimis juolludan measta 400.000 duháha iešguđet doaimmaide. 

Eanemus dain ruđain oaččui Internášunala Sámi Filbmainstituhtta «Mamma Mu» filbmabargui. Filbma galgá dubbejuvvot sámegillii. 

Eará prošeavttat mat ožžo ekonomalaš doarjaga ledje:

Lïksjuon Sámien Siäbrrie prošektii «Árbbiemáhttuo praktihkalaččat» 30 000 ruvnna.

Girona sámesearvvi prošektii «Searvvi čoakkálmas» 75 900 ruvnna

Nina Nordvall Vahlberg prošektii «Tjuodjal» 40 000 ruvnna. 

Stuhkie Sámesearvi Stockholmmas «Stuhkie filbmafestivála 2020» 63 000 ruvnna.

Erika Nordvall Falck prošektii «Árbevirolaš fáhcat Arvvesjávrris ja Árjepluovves» 37 000 ruvnna.

Dan dieđiha Ruoŧa Sámediggi iežaset neahttasiiddus.

Norgga sámediggeráđđi juolluda ges 300 000 ruvnnu doarjaga Internášunála Sámi Filbmainstituhttii (ISFI) Mamma Mu animašuvdnafilmma dubbemii davvi- ja lullisámegillii.