Maŋŋebárgga celkkii Ruoŧa ráđđehusa ealáhusministtar Karl-Petter Thorwaldsson preassakonferánssas ahte Gálloga ruvke lea ožžon rogganlobi.
Ealáhusministtar Karl-Petter Thorwaldsson celkkii preassakonferánssas ahte sii leat čađahan vuđolaš guorahallama go leat mearridan Gálloga boahtteáiggi.
– Lea historjjálaš mearrádus go Jokkmokk Iron Mines AB oažžu rogganlobi Gállogii, muhto bidjat olu gáibádusaid fitnodahkii. Ruvkedoaimmat fertejit váldit nu unnán eatnamiid go vejolaš, boazodoalu dihte. Dasa lassin ferte fitnodat máksit Jåhkagaskka čearu johtingeainnuid liigegoluid. Fitnodat ferte maiddái cegget áiddiid ja gulahallat lagamus čearuin, celkkii Ruoŧa ráđđehusa ealáhusministtar Karl-Petter Thorwaldsson.
Servodat
Ruvkedoaibma čuohcá lundui ja boazodollui. Johkamohki suohkan lea cealkán ahte birgejit buorebut jus ruvke ásahuvvo, dajai ealáhusministtar.
– Leat olu riikaberoštumit ja boazodoalloguovllut dáppe, muhto guovllus gosa Gálloga ruvke lea plánejuvvon, doppe ii gávdno juste luondduriggodat Laponia natura 2000. Doppe lea dušše boazodoallu mii lea riikaberoštupmi, čilgii ealáhusministtar Karl-Petter Thorwaldsson preassakonferánssas.
Sámediggi čuovvola
Ruoŧa sámedikki ságadoalli Håkan Jonsson lea hirpmahuvvan.
– Olu instánssat leat cealkán mot dat ruvkemearrádus čuohcá sidjiide, muhto Ruoŧa ráđđehus lea mearridan dan ášši áigá juo. Ráđđáhusa ákkat leat nu čađacuovgit, ja mun oaivvildan ahte ráđđehus lea áigá mearridan ášši, lohká Håkan Jonsson
Mot Sámediggi bargá dál ovddosguvlui áššiin?
– Mii iskat dal mearrádusa eatge guođe ášši. Vaikko fitnodat lea ožžon dál rogganlobi, de sis eai leat buot lobit mat dárbbašuvvojit. Sii eai sáhte dušše rahpat ruvkke dál, ja Sámediggi čuovvola ášši. Ii leat Sámediggi mii sáhttá loktet ášši alit instánsii. Lea duostilis mearrádus Ruoŧa ráđđehusas go dál gávdno Girjás- ja Fovsen-duopmu, ja jus muhtin vuosttalda mearrádusa ja sámit vuitet alit instánssain, de ruvkket bohtet heajos dillái. Muhto dan ferte oaidnit, mii čuovvolit ášši čilge Håkan Jonsson.
Metálla
Ealáhusministtar Karl-Petter Thorwaldsson čilgii ahte Ruoŧŧa dárbbaša metállaid, mat leat deaŧalaččat ruoná nuppástussii.
– Boahtteáiggis mii dárbbašit eanet metállaid, el-biillaide ja mobiillaide. Mii dárbbašit metállaid ja dat lea deaŧalaš Ruoŧa ekonomiijai. Ruoŧa láhka galgá čuvvojuvvot. Guovllus gosa Gálloga ruvke lea plánejuvvo, doppe leat riikaberoštumit, nu go boazodoallu ja ruvkedoaibma. Boazodoallu dárbbaša olu areálaid mat dál váikkuhuvvojit ruvkedoaimma geažil. Ruoŧa ráđđehusas lea stuora ovddasvástádus sámi ealáhussii ja kultuvrii. Dat váikkuha maiddái min mearrádussii, čilge Thorwaldsson.
Hehttejit boazodoalu
Håkan Jonsson dajai ođđajagemánus Ávvirii ahte Gálloga ruvkeplánat hehttejit boazodoalu guovllus, ja luondduárbeguovlu Laponia váikkuhuvvo negatiivvalaččat.
– Sámedikkis lea váldi mas lea ovddasvástádus sámi kultuvrii ja boazodollui. Gálloga ruvkeplánat hehttejit boazodoalu boahtteáiggi guovllus, ja luondduárbeguovlu Laponia váikkuhuvvo negatiivvalaččat. Mis lea doarjja eará instánssain go cealkit ahte gieđahallanlohpii ii galgga juolluduvvot. Ruvkeásaheapmi, mas lea nu oanehis áigodat, dat ii leat vuoiggalaš servodatekonomalaš dillái dehe birrasii.
