Ruoŧa ráđđehus kártejit sámiid psykalaš dearvvašvuođa

Ruoŧabeale Sámediggi oažžu 700 duhát ruvnnu Ruoŧa ráđđehusas čohkken dihte daid dieđuid mat Ruoŧas ja Sámis gávdnojit sámiid psykososiála dearvvašvuođa birra. Dán dahket čalmmustahttin dihte makkár dárbbut gávdnojit ja vai iešsoardinlogut njiejašedje. Dan dieđihii Ruoŧa ráđđehusa odne.

– Stuorra váttisvuohta

Preassadieđáhusas čállet ahte ulbmil lea hábmet oktasaš vuogádaga mii sáhttá gávnnahit makkár dárbbut leat dán suorggis. Mihtu lea čohkket buot dutkamiid ja prošeaktabohtosiid mat gávdnojit sámiid psykososiála dearvvašvuođa birra.

 – Mii han diehtit ahte lea olu, olu stuorát várra gártat eahpedearvvašlaš psykalaš dillái ja stuorát iešsoardinvárra sámi boazodolliid gaskkas go eará servodatjoavkkuin. Dát lea stuorra hástalus, stuorra váttisvuohta maid mii ráđđehusas váldit duođalaččat dadjá dearvvašvuođaministtar Gabriel Wikström Sámeradioi ja SVT Sápmái.

Ii lohpit SÁNAG ruoŧabeallái maid

Sámi searvvit dego Sáminuorra ja Ruoŧa Sámiid Riikasearvi leat maŋimuš jagiid čalmmustahttán sápmelaččaid psykalaš eahpe-dearvvašvuođa. Sámeradio ja SVT Sápmi leat ovttasráđiid NRK Sámiin maŋimuš vahkkuid muitalan ahte olu ruoŧabeale sápmelaččat vedjet hejot eai ge oaččo dan veahki man dárbbašit Ruoŧas. Máŋggas leat muitalan ahte leat šaddan Norgii johtit oažžun dihte veahki dearvvašvuođabargiin geain lea sámi giella- ja kulturmáhttu. Olusat sávvet Ruoŧa beallái ásahuvvot sullasaš doaimma go SÁNAG.

 – In hálit spekuleret makkár doaimmat dás bohtet, muhto lea dehálaš ášši ja mii dál kártet man stuorra dárbbut Ruoŧas leat, dadjá Wikström

Kárten galgá bistit maŋit boahtte geassái ja dan galgá Sámediggi ovttasráđiid Álbmotdearvvašvuođaeiseválddiin čađahit.