Ruoŧa ráđđehus ja sámeministtar Amanda Lind dieđihedje gaskavahku ahte sii álggahit Ruoŧa boazodoallolága guorahallama maŋŋel Girjás-duomu.
Maŋŋel go Girjás vuittii Ruoŧa stáhta vuostá ođđajagemánus Alimusrievttis, de beassá čearru hálddašit bivdo- ja guolástanrivttiid čearu eatnamiin. Máŋga eará čearu leat maid gáibidan oktonas rivttiid, earret eará Dálmma čearru.
Ruoŧa ráđđehusa sámeminsttar Amanda Lind dieđihii digitála seminára bakte ahte Ruoŧa ráđđehus dál álggaha guorahallama. Son čilgii ahte Ruoŧa boazodoalloláhka, mii lea 50 jagi boaris, dárbbašuvvo heivehuvvot Girjás-dupmui ja danin ferte guorahallat dan.
