Dutkit lea dutkan mo ruoššaluossa váikkuha luossajogaide. Dutkit leat gávnnahan ahte olu eallit ávkkástallet daid ja várra ruoššaluossa ii leat nu stuorra giksin nu mo olbmot navdet.
Framsenter dutkanprográmma lea ruhtadan ruoššaluossaprošeavtta. Dutkit leat dutkan makkár váikkuhusaid ruoššaluossa lea buktán Njiđggujohkii Unjárgga gieldda ekovuogádahkii. Lea gorži mii bisseha ruoššaluosa gorgŋemis badjelabbui ja dutkit leat beassan buohtastahttit mo dat váikkuha johkii, sihke vulobeale ja bajábeale goržži.
Dutkiid dutkanbohtosat duođaštit ahte ruoššaluossa mii gorgŋe jogaide, mearkkaša eambbo biepmu rábbeelliide, guliide ja lottiide, čállá forskning.no. Naturtjenester i Norge beaivválaš jođiheaddji Rune Muladal lohká sii leat vuohttán ahte muhtin čázádagaide lea ruoššaluossa gorgŋegoahtán gođđanáiggi.
– Vaikko ruoššaluosas ledje eanaš buorit váikkuhusat, de eat galgga vajálduhttit ahte dan bokte sáhttet leavvat dávddat, gilvu ja ahte čázádaga guolit hávket go ruoššaluosat jápmigohtet ja guohcagišgohtet. Mii fertet buot gažaldagaid vuđolaččat iskat ovdalgo áddet mo ruoššaluosa leavvan sáhttá váikkuhit luossajogaide Norggas, lohká dutki Mark Wipfli.
Jagi 2019:s registrerejedje 20.029 ruoššaluosa Norggas ja 6.494 ruoššaluosa 2017:s. Ruoššaluossa lea čáhppeslistui biddjon eará sávakeahtes elliid searvái nugo miŋka ja neahttabeana.
