Dán jagi servet sullii 1000 nuora gilvvuide sihke Suomas, Norggas ja Ruoŧas. Nuorat servet 16 iešguđetlágan valáštallamiin.
Romssas lágiduvvo Barents Summer Games čakčamánu 2.-4. beivviid. Ruošša ja Ukraina konflivtta dihte lea Barents Sports Commitee mearridan lihccut Ruošša buot Barentsovttasbargguin mat leat bistán 70 jagi.
– Nuoraid várás lei dehálaš ahte gávnnaimet čovdosa, nu ahte valáštallanlonohallan jotkojuvvo riikkarájáid badjel. Pandemiija lea dagahan ahte olu Barents Games leat ferten heaittihit. Barents Games lea valáštallanillu. Dat nanne ovttasbarggu riikkaid gaskka ja lea nu dehálaš «olbmos-olbmui» ovttasbarggus, dadjá Ruoŧa ovddasteaddji Barents Sports komiteas, Katarina Halvardsson, preassadieđáhusas.
Vera Arntsen lea Barents Sports internationála koordináhtor. Son lea giitevaš go Norgga Barentsčállingoddi lea ekonomalaččat veahkehan stohkosiid Romssas, vaikke vel Ruošša ii beasa searvat.
– Go Barentsčállingoddi doarju stohkosiid ekonomalaččat, vaikke vel Ruošša ii leat mielde lágidemiin, de dat dahkká ahte valáštallan sáhttá seailluhit ovttasbarggu ja doalahit struktuvrraid lágideamis. Dat mearkkaša olu sihke valáštalliide, hárjeheddjiide, duopmáriidda ja jođiheddjiide, maiddái válaštallamii ja gávpogiidda. Barents Games buktá valáštallanilu, nanne ovttasbarggu, nanne álbmotdearvvašvuođa davvin, lokte báikkálašbirrasiid ja mii beassat deaivvadit, dadjá Arntsen preassadieđáhusas.
