-Almmuhus-
OĐĐASAT– Ruošša dat muosehuhtii GPS

– Ruošša dat muosehuhtii GPS

-

-

Norgga Suodjalusdepartemeanta duođašta sis leat dieđut ahte Ruošša militeara Guoládagas dat muosehuhtii GPS-signálaid dan botta go Trident Juncture hárjehallan lei NATO:s.

– Mii čuovvut dárkilit dilálašvuođa fárrolaga eiseválddiiguin. Nu go diehtit, de lea Norgga Olgoriikadepartemeanta ovdal dán ášši váldán ovdan Ruošša eiseválddiiguin, čállá Suodjalusdepartemeanta e-poasttas NTB:i.

 

Ii čuoza girdiide

Sii duođaštit ahte GPS signálat leat muosehuvvon golggotmánu 16. beaivvi ja skábmamánu 7. beaivvi gaskkas, ja leat eananveagat Guoládagas mat leat dán bargan.

Sekšuvdnahoavda Svein Johan Pedersen Áibmosuodjalusa girdišilju ja girdisihkkarastinossodagas duođašta maid ahte leat vuohttán heađušteami GPS- signálain. Muhto sii eai bala gal dakkár daguid čuohcamis girdisihkarvuhtii.

 

Liigerusttegat doarjjan

Girdijohtolatbearráigeahčču ii ge bala girdisihkarvuohta hedjonit jus GPS-signálat jávket. Eatnamis leat sis navigerenvuogádagat maidda ii dárbbašuvvo GPS, ja girdivuoddjit atnet daid jus GPS signálat jávket dahje botkot. Dát rusttegat sáhttet adnot sihke seaivumii ja girddidettiin.

Girdijohtolatbearráigeahčču lohká sin vuohttán muosehuhttima máŋgii go GPS- signálat leat hedjonan dahje jávkan girddidettiin. Girdiin leat dattetge rusttegat mat fuomášit dan ovttatmano.

BarentsObserver čálii álggus skábmamánu ahte Finnmárkkus lei girdi vásihan ahte GPS jávkkai, ja maŋemus áiggiid leat girdit Suomas maid dieđihan dan.

 

Putin šiitá

President Vladimir Putina ságadoalli Dmitrij Peskov šiittii mánnodaga ahte Ruošša dat lea muosehuhttán GPS- signálaid.

 

-Almmuhus-