-Almmuhus-
-Almmuhus-
OĐĐASATRuonáeatnamis oahppame iešstivrejumi birra

Ruonáeatnamis oahppame iešstivrejumi birra

-

-

Logi sámi journalistta leat johtime Kalaallit Nunaatas fárrolaga. ‑ Dát galgá addit ođđa perspektiivvaid oaidnit maid mearkkaša iešstivrejupmi duohta dilis.

Dat logi sámi journalistta barget iešguđet sámi medias ja iešguđet riikkas ja bohtet sámi mediain nugo YLE Sámis, SR Sámis, NRK Sámis ja maid luođojournalisttat. Sámi journalisttaid searvvi (SJS) mátkkis masa maiddái Ávvira journalista lea searvan, finadit guovddáš ásahusain oaivegávpogis Nuukas ja loahpas vahku mannet ges boaittobeale báikái Ilulissatai.

 

Oahppat iešstivrejumi birra

Sámi journalistasearvvi jođiheaddji Inga Marja Steinfjell, gii maid lea mátkkis oktan máŋggain stivralahtuin, lohká juste Kalaallit Nunaata ja sin ruovttustivrra leat dehálaš oahppun.

 – Dat addá perspektiivva oaidnit maid mearkkaša iešstivrejupmi praktihkas, go iešstivrejumi birra han hupmet min politihkkárat maid. Go lea oaidnán iežas čalmmiiguin maid iešmearrideapmi gáibida, de sáhttit maid jearrat buoret gažaldagaid sámi politihkkáriin, dadjá son.

 

Álki válljet

Liv Inger Somby gii lágidan mátkki, lohká maid lei hui álki válljet juste Kalaallit Nunaata ja Nuuk.

 – Lea hui miellagiddevaš boahtit Nuukii, go lea dat guovddáš árktalaš guovlu gos álgoálbmogis leat váikkuhanvejolašvuođat. Inuihtaid servvodat sáhttá leat ovdagovvan sápmelaččaide movt sáhttá lihkostuvvat, ja dat barget dan iežaset eavttuid vuođul. Ja árktalaš guovllu hástalusat gusket seamma olu sápmelaččaide go dat gusket deike. Mis leat luondduresurssat, dálkkádatrievdan, olbmuid birgejupmi, ja ovdánahttin, dadjá son.

 


VAHKKU JOĐUS: Lágideaddji Liv Inger Somby ja SJS jođiheaddji Inga Marja Steinfjell lohkaba dehálažžan viiddidit oainnu ja gazzat oahpu ruovttustivrra birra.
Govva: Marit Elin Kemi.

 – Riggodahkan

Somby jáhkká ahte dát mátki šaddá stuora ávkin boahtteáigái.

  – Dál eat soaitte oaidnit makkár riggodahkan dát mátki lea, muhto moatti jagi geahčen jáhkán mii oaidnit dan čielgaseappot. Sámi journalistasearvi sáhttá goit ain čevllohallat dainna konferánssain mii lei Álttás 2004:s, mii dagahii ahte bođii álgoálbmotjournalisttaid ja TV- ovttasbargu WITBN. Ferte ovttatládje jurddašit ovddasguvlui,d dadjá Somby.

 

Dát mátki máksá birrasiid 250.000 ruvnno. Searvi ii leat juohkán stipeanddaid muhto seastán ruđa njeallje jagi go eai leat máksán stipeanddaid, birrasiid 75.000 ruvnno juohke jagi. Sin váldoruhtagáldu lea kopiijabuhtadus.

Steinfjell lohká vásihan ahte go leat addán stipeanddaid, eai leat journalisttat álo lihkostuvvan ollašuhttit plánaid.

 – Mii geat leat dáppe dál, eat leat mahkke Ruonáeanan čehpiid, muhto mii oahppat ja sávvamis dat dahká min buoret journalistan ruovttus. Ja jus jurddaša goluid, de lea divrasit gollu go leat journalisttat geat eai leat oaidnán máilmmi, ja dat lea mu mielas maid demokratiijagažaldat, dadjá Steinfjell.

 

Jearahalle stádaministtara

Steinfjell mieđiha ahte dát mátki soaitá orrut vehá luksus, muhto son ii jáhke journalisttaid lean šaddat vuolgit dán guvlui.

 – Olmmoš arvá eambbo go lea joavku. Ja mii leimmet golmmas geat jearaheimmet stádaministara Kim Kielsena. Ii leat sihkar livččii go okta olmmoš oba oažžut ge jearahallama, muhto go mii leat fárrolaga ja stuora delegašuvdna, dieđusge ruonáeatnama ovdaolmmoš ja stádaministtar válddii dili, dadjá son.

 

Dán vahkkus beasat Ávviris lohkat eambbo ságaid Kalaallit Nunaatas.

 

 

 

 

-Almmuhus-