Oaiviliskkadeamit Finnmárkkus čájehit ruksesruoná vuoiŋŋa dán jagi Fylkkadiggeválggaide. Kárášjoga sátnejođiheaddji Anne Torild Balto sávašii bohtosiid duohtan šaddat.
Oaiviliskkadeamit Finnmárkkus čájehit ruksesruoná vuoiŋŋa dán jagi Fylkkadiggeválggaide. Kárášjoga sátnejođiheaddji Anne Torild Balto sávašii bohtosiid duohtan šaddat.
Respons nammasaš oaiviliskkadanfitnodat lea suoidnemánus riŋgen 600 finnmárkulažžii ja čađahan oaiviliskkademiid NRK ja Amedia ovddas. Gažaldagat maid sii leat jearran leat: «Jus livčče fylkkadiggeválga ihttin, makkár bellodaga de jienastivččet?» ja «Jienastit go don Stuoradiggeválgii 2013?» ja «makkár bellodaga?». 63 proseantta dain 600 olbmos mat leat jearahallon, muitaledje makkár bellodaga sii jienastivčče.
Ruksesruoná vuoigŋa
Oaiviliskkadeamit čájehit ahte Bargiidbellodat oččošii 48.9 proseantta jienain mii lea 9 proseantta lassáneapmi 2011 fylkkadiggeválggaid ektui. Dáinna bohtosiin oččošii sii vel guokte lassiáirasa fylkkadiggái.
Stuorimus lassáneapmi proseanttaid mielde lea Guovddášbellodagas. Iskkadeami vuođul ožžot sii 6.3 proseantta jienain ja ovtta liigeáirasa fylkkadiggái. 2011 Fylkkadiggeválggain ožžo sii 3.9 proseantta jienain.
Olgešbellodat lea ges massán buot eanemus jienaid. Oaiviliskkadeamis ožžo sii 14.6 proseantta jienain, mii lea 5.8 proseantta unnit go 2011 válggain. 18.6 proseantta sis geat leat jearahallon, vástidedje ahte sii jienastedje olgešbellodaga stuoradiggeválggain, ja áigot dál jienastit bargiidbellodaga.
Čohkkešii sis-Finnmárkku
Kárášjoga sátnejođiheaddji Anne Toril Eriksen Balto, gii lea Guovddášbellodaga nubbin evttohus fylkkadiggái, illuda oaiviliskkadeami bohtosiidda . Son sávvá ge ahte dát šaddet válgaboađusin.
– Iskkadeami bohtosat gal leat illudahtti ja čájehit ahte olbmot leat fuomášan man dehálaš buorre guovllupolitihkka lea Finnmárku vuođđoealáhusaide. Dušše Kárášjoga dáfus leat doarjja ealáhusfondii unnon beliin, ja dat gal lea stuora vahát min vuođđoealáhusaide. Jus beasan fylkkadiggái, de goit lea doarjja ealáhusfoanddaide juoga mainna áiggun áŋgiruššat, ja mii sis-Finnmárkku politihkkárat berrešeimmet ovttasbargat go min ealáhusaid livčče ain potensiála ovdánahttit, dadjá Guovddášbellodaga Anne Toril Balto.
(Ášši lea almmuhuvvon báberaviissas 04.08.15)
