– Rukses dási mearrádusa hoahppočađaheapmi nuoraid- ja joatkkaskuvlla dásiin bođii fáhkka ja ii čuovo fágalaš ráđiid, lohká Bufdir jođiheaddji Mari Trommald.
Mari Trommald lea direktevra Mánáid-, nuoraid-, ja bearášdirektoráhtas, ja lea maid jođiheaddji hearkkes mánáid ja nuoraid koordinerenjoavkkus. Son dajai gaskavahkku iđđedis NRK:i ahte son lea hirpmahuvvan go ráđđehus bijai olles riikka nuoraid- ja joatkkaskuvllaid rukses dássái.
– Dat maid fágabirrasat leat ávžžuhan, cuoŋománu rájes diibmá, lea ahte eat galgga bidjat johtui generealla eastadandoaimmaid njoammuma ektui mánáide ja nuoraide danne go dat eai leat govttolaččat, lohká Trommald.
Juovllaid dajai Erna Solberg ahte mihttu lea unnimus lági mielde bidjat skuvllaid rukses dássái. Rukses dásis eai leat nu gallis skuvllas oktanaga, ja oassi oahpahusas lea digitálalaččat ruovttus.
– Čuohcá hearkkes mánáid dillái
Trommald vuorjašuvvá go gáržžideamit čuhcet guovtti jovkui, mánáide geat gillájit veahkaválddálašvuođa ja illasteami ruovttus, ja mánáide geat ásset hearkkes ruovttuin dahje geat leat doaimmashehttejuvvon.
– Dás ferte veardádallat ovdamuniid njoammuneastadeamis váikkuhusaid ektui mat leat go mánát ja nuorat eai boađe skuvlii. Dat mánát geat rahčet buot eanemusat dál, ja geat leat riskkas geavvat olggobeallai nu ahte eai šat nagot beassat ruovttoluotta fas, sidjiide dát váikkuha, deattuha son ja sávvá ahte ráđđehus oaidná dárbbu eanet vuđolaš doaimma čađahit.
Oahppoministtar Guri Melby lohká ahte mearrádus dahkkui dan dihte go koronanjoammun lea lassáneame Norggas.
– Lea dárbu nationála doaimmaide dál, lohká son ja deattuha ahte sii guldalit dárkilit fágabirrasiid.
– Mun barggan nu olu go sáhtán doalahit skuvllaid rabasin, lohká Melby. (©NTB)
